ANGEL

             RINNA

"Kan lo thu ve mai ang e aw, len pui tur pawh kan hmu zo ve bawk si lo a, min lo len pui ve mai teh u" nui deuh sang pah chuan David chuan a ti a, school khat a lut tlang deuh vek kan ni bawk nen, Rinmawia te leh kan thianho in kar vel pawh chu hre lo chu an awm lem lo a, kan zu fin ve rawih pawh chu nuam chu an tih  hmel vak bik  lo hlawm hle a.

"Aw khaw nge Venghnuai lam a in hmeichhe kal pui te kha an awm tak a" Remruati chuan mi rawn en pah chuan a rawn ti ve vat bawk a, kei chuan hrethiam lo fe chuan ka thiante ho chu ka en nghal thuai a, Remruati ten min len pui hman loh thu chhuanlam an lo siam chhan vel leh dawt an sawi chhan vel chu rin dan chu ka nei nghal mai a.

"An haw tawh alawm, chuvang chuan mi len pui ve mai rawh u" za lo tih hriat tak a nui lui pah chuan BJa chuan a ti leh deuh kher a, "Tu te nge in len pui reng reng a? Chuvang ani maw in rei em em a?" ka lo ti ve vat bawk a, Angeli chuan mi rawn en nghal thuai a, "Thil kan zu lam tur kha i u thiannu siami te haw tur nen kan in nang a kan chhuk thlak pui mai mai mawle, chutiang a leng kan ni lo" Gabriel chuan a rawn ti ve leh a, an thu in hmu lo in kar ah kei chu ka awm a, a tuar ber tu ah ka tang tih chu ka hrethiam ta mai bawk a.

"Junior i kal ve lo ami a?" inthiam vak lo tih hriat tak hian Remruati chuan mi rawn ti leh a, "Aw a kal ve lo a, saw tah pawh a thiante a lo nghah mawlh mawlh kha, a hrim hrim in nang pawh rawn kal leh tur tho te chu nichin khan awm tlang ve mai tur che lawm le, tah ka bul ah lo thu teh,nichin a kan thil sawi pawh kha kan la sawi zo hleinem" ti in ka chhan hma chuan Remsangi chuan a rawn ti nghal thuai thuai a.

"A tlai tawh dawn tan sia, Ruat i duh leh lo la awm la, kei chu ka lo zu haw ang aw" Angeli chuan a rawn ti a, "ka lo thlah ang che" Sanga (a bul a lo thu) chuan a lo ti ve nghal vat bawk a, "aih a ngai lo keimah pawn ka haw thei alawm" tichuan Angeli chuan a hnar a, mahse Sanga chuan thlah luih chu a tum hmel hle a.

 "Lo kal rawh, keiman ka lo thlah ang che" ti pah chuan Angeli ban ah chuan ka kai a, ka kal pui nghal mai a, "i hmanhmawh lutuk, ka hah ania, chuan ka ban i hmer na hi thlah teh a na ania" a tih chuan ka thlah ve vat mai bawk a, ka thinrimna thup luih hram hram ka tum kha a chung ah chuan ka ti lang tih reng chu ka lo hre tawh lo a.

"Khang ho i len pui duh vang khan maw ka bul ah i len hman loh" ka tih chuan inthiam loh hmel deuh tak chuan hnuai lam chu a melh tlat a, " Min chhang la, tunah hian ka in sum hram hram ania" dam deuh zawk chuan ka ti leh a.

"Ka tihpalh, i thiante ho Venghnuai a Hmeichhe ho nen a an chhuk thla kha ka hmu a, i tel ve anih ka ring ringawt a, chu bak ah Zu in ka huat zia chu i  hriat kha, Ruati khan 'zu an lam dawn aniang' ati bawk sia, kha vang khan dawt ka lo sawi tir tawp anih kha" 

"Zu ka in ve lo tih ka sawi tawh kha, min ring lo ami a? Chu bak ah ka thiante ho i hmu a, min hmu ve lo a, chuan ka tel i ring ve nghal ringawt a, Remruati'n chhuanlam a rawn siam khan kei chuan 'an hman ngang lo aniang, hman ni se chuan min len pui ngei ngei ang' ti in ka ngaihtuah asin, a chhan chu ka ring tawk che a, kha tiang thil kha a thlen kha ka ring pha lo ani" 

A ngawi reng a, mahse tum dang a a ngawih chuan a nui hmel tal kha ka chan ani thin mahse vawiin chu boruak a dang ngawih ngawih ani, a ni a nui lo a, a nui hmel hlimpui thin em em tu pawh hian tih nuih chak na ka nei chuang lo, "Ti rawh haw phawt mai ang, vawiin tan chuan tawk mai rawh se" ti pah chuan kal ka tum nghal mai a.

"Aihh .. Tunah sawi zo nghal ang, i thinrim leh i  lungawi lo tih hre reng chung chuan ka awm a nuam chuang lo ang, ka thiamloh ania, min ngaidam rawh, ka ring tawk lutuk che, chuan ka duh lutuk bawk che, ka duh luat ah che ka chan mai ang che tih ka hlau thin a, chuvang chuan chan che ka hlauh luat ah ka rinna che ka lo hmuh kan palh a niang" zawi deuh sap chuan a ti a, a mit a mittui tling deuh te leh a hmel in thiam loh hmel tak te chuan ka thinrimna chu a ti dai sawng dawng ni mai hian ka hria.

"Kha i tap mai ang e, i tah chuan a zahthlak viau ang, mikhual nula ka vel amaw an ti dawn nia" ti pah chuan a biang ah chuan ka chul a, a ni pawh chu a rawn nui deuh sak a, "Vanram nui suh" rang deuh chuan ka lo ti nghal a.

"Ti khan mi koh ziah suh, chuan eng vang in nge ka nuih loh ang, nih leh ka nui lo ang, ka tum char char ang, biak pawh min be miah suh" a ti nghal bawrh bawrh a, titauh ching haw em em thintu ka tan ngei pawh hian he nu titau hi chu a ngeiawm thlawt loh ani.

"Awle 'Vanram' ti a ka koh che i duh tawh loh chuan midang hmuh theih tur in nui ve tawh miah suh"

" Naaa engvang nge maw ka nuih loh ang le?"

"Ka duh lo, i nui hmel hi a tha lutuk a, midang lak ah ka chan mai ang che tih ka hlau alawm" nui deuh sang chuan ka ti a, "i van chimawm tak e aw" ti pah chuan mi chu a chum leh sek tawh.

"Kan haw dawn nge kan la leng dawn?" a rawn ti a, ka chhoh tirh a phul hmun kha ka ngaihtuah chhuak a, engmah sawi lo chuan ka kai a, ka kal pui leh nghal a, phul hmun chu kan thleng a,in si rial chuan kan thu dun a, thil eng eng maw chu sawi chuan kan nui kan nui ta a , ka bul a a awm hi chuan engkim hi a hmun dik tak ah a awm ni mai hian ka hre thin.

Tlai ni tla tur in kawl a chhun sen phut mai te, thli thaw heuh heuh in a phul a chhem che seuh seuh te, ka bul chiah a min si rial a Angeli thu a, a nui hmeltha tak hmuh tur a awm te chuan ka lung chu an awi tak zet zet ani, "Zan thim tak hi a tangkai na em em chu i nun a arsi eng ber chu , chu zan thim tak chuan a ti chiang zual dawn ani" an lo tih thin te chu a dik ta em em hian ka hria a, kha ti khawp a na leh hreawm khan hun ka hmang a, mahse ka nun thim tak ah chuan Arsi eng ber mai, Pathian in ka tan a min pek Angel chu ka kiang ah chu hun thim tak ah chuan a rawn hruai thleng ani.

"Eee in haw daih tawh maw tia, in lo len hran duh vang ani maw haw in lo tum ni?" ti a mi rawn auh na lam chu kan hawi chho nghal a, ka thiante ho chu an lo nui deuh vur vur hlawm a, mahse midang chuan mak tih hmel tak chuan mi chu an en deuh ha hlawm bawk a.

"Lo va haw rawh u, Remruati te nen chuan in hnung ah kan rawn kal ang"tichuan David chuan midang ho chu a ti a, midang ho pawh chu an chhuk ve mai bawk a, an hnung deuh ah chuan an ni pawh chu an chhuk ve leh a, la kham lo viau mahila keini pawh chuan kan zui haw ve leh vat a.

Zan lam ah Chuan kan leng phei ve leh a, A nu leh pa te an lo awm lo bawk a, an unau hnih chauh chuan an awm leh a, "Khaw nge ka pa Mawia te hi an awm a? Zanin chu Indopui pakhatna lai vel hrilh leh ka duh asin le" tichuan David chuan Remruati chu apa te awm na chu a zawt a.

"In ninawm an upa ve tawh si, dawt hrilh hrilh zel suh u" a lo ti ve vat bawk a, nui deuh vur vur chung chuan " aw an awm na lawm kan zawh che, dawt lam kan sawi lo" tichuan BJa chuan a lo ti ve leh vat bawk a.

"Inkhawm zan anih hi , an inkhawm ang chu mawle, chutiang mai mai zawt zawt suh u" tichuan Gabriel chuan a lo chhan sak a, "Eee a tih dan hi Remruati lam deuh hi a tang tlat mai" tichuan an chhaih zawm leh nghal a, an ni pahnih hi chuan min ti hlim thin teh e.

"Thla a eng bawk a, thlang lam Veranda ah khuan keini chu thu ila, an bul a awm chuan kan â leh dawn tlat" ti pah chuan Angeli chu thlang lam Veranda chu ka pan thlak pui a, "Tlai ah in kal hrang tawh bawk, zan ah in kal hrang leh a, rualpawl zawng hian awm ve teh u" tichuan mi rawn au fiam vel a, an nui deuh dar dar bawk a.

"Nang chu i ti zahthlak tep zel ania aw" tichuan Angeli chuan mi rawn sik zeuh a, a kut a lo man sak pah chuan " i kut rang lutuk hi chu vawiin tlai mi chum na ah pawh ka sil vek ania aw, chu bak ah a zahthlak na a awm lo, kan thiante vek an nia, kan chungchang an hre vek bawk a, a ho lutuk" ka lo ti ve vat bawk a.

"Taka thil ho deuh ania, mahse ka hre chak bawk sia, mahse i  thinrim ka hlau tho bawk sia" a rawn ti a, "Eng maw? Sawi la , ka thinrim lo ang" ka lo ti ve vat bawk a.

"Vawiin khan Sanga kha i thik em?" nui deuh suk pah chuan a ti a, "Thik lo e a, thik na chhan tur a awm hleinem, i bul ah a thu ve ani mai a, a ho emai, kha tiang mai mai ka thik ten" ka tih chuan , "Van mak ve, kei chuan Remi kha ka thik asin, ka  hmuh dun ngat phei che u kha chuan, nang chuan i thik si lo a, min Hmangaih ve lo aniang a?" a ti a.

"Eng a? Hmangaih maw? chu ti chu nangin min Hmangaih tih na ami?"

"Ka sawi sual anih kha" a ngawi zui hmak a, a zah hmel hle bawk a, "Min Hmangaih ami?" ka tia lawm ka ti nawn leh kher a, "Aw Hmangaih e, chung te chu i hre mai lo ami?" a rawn ti a.

"Eng tin nge ka hriat ang, i la sawi ngai reng reng hleinem"

"Kan in kai a, 'ka Hmangaih che' tih sawi lo in , kan hun leh kan neih engkim kan in pe tawn a, 'ka Hmangaih che' tih sawi lo in, In Hmangaih ten an tih ang engkim deuh thaw kan ti dun a, 'ka Hmangaih che' tih sawi kher lo in, chu ti chung chuan 'ka Hmangaih che' tih kha sawi kher ngai ah ka ruat lo alawm, thu in kan sawi lo a, mahse Hmangaihna chu kan ti lang ni mai ah kei chuan ka ngai alawm" 

"Ni e i sawi dik alawm, kei pawn ka Hmangaih lutuk che alawm"

"Tak tak maw? Nih engvang in nge min Hmangaih a?"

"Imm Hmangaih e, Hmangaihna hian chhan a mamawh lo a, i hmelthat vang te, i rilru te leh midang ai a i chungnung vang a Hmangaih che ka ni lo a, ka Hmangaih tawp mai che ani, chu ti ni lo a chhan leh vang awm a ka Hmangaih che anih ngai chuan ka Hmangaihna che ti famkim tur hian chhan a awm a ngai dawn a, chu chu Hmangaihna ah kei chuan ka ruat lo ani, Hmangaihna chu amah a awm tawp pawh hian a famkim nghal a, thil dang amah ti famkim tu tur a mamawh tawh chuang lo ani"

A nui deuh suk a, a nui hmel mawi em em mai chu kei chuan ka lo thlir reng bawk a, "Mi en suh, thla eng en duh in ani lawm ni thut chhuah i  rawt ? Thla en rawh" a rawn ti a, "ti khan lai deuh khan awm ziah suh, i duhawm lutuk a, fawh che ka chak thei teh mai ani" ka tih chuan "nghal viau zel lo mai teh, awm ve mai mai rawh" ti pah chuan ka mal ah chuan a chum leh a.

"Nih maw Junior Hmangaihna ah hian eng nge pawimawh ber ni a i hriat?"

"Ka hre chiah lo le, mahse Rinna hi a pawimawh ka tia, kan in rin tawn chuan eng pawh thleng se kan paltlang thei mai ang, a nih loh chuan Rinawm reng mahila min rin chuan si loh chuan rinawm lo ah min chhuah tho tho dawn tih na ania"

"Imm ka hrethiam deuh reuh"

"I la hrethiam chuang lo maw? Nih chuan ti zawng hian kan sawi ang e aw, Hmangaihna ah hian pawimawh fal bik a awm lo a, amah Hmangaihna tawp hi a pawimawh ber ani mai, tichuan a tha em?"

"Awle tawk tawh mai rawh se, ka hrethiam e" ti pah chuan a nui sen sen a, a nui hmel mawi tak te chu ka en kham thin mawlh lo ani e, en reng pah chuan ka chuk zeuh a , "Nghal suh ka tih mawlh mawlh kha mawle" ti pah chuan mi sik leh neuh neuh tawh a, a bul ah hi chuan engkim hi a nuam vek mai anih hi.

        A  TAWP TA...

         Thu Belh

I lak ah i Hmangaih in rinna a nghah ngam nan rintlak in awm la, Rinawmna dik tak nunpui ang che, A ruk a phatsan i huatna chuan Rinawmna hlut zia hriat nawn tir fo che sela, Rinawmna hlut zia hre tur in i Hmangaih chung ah rinna nghat ngam ang che, chu ti chuan mi duhawm tak i ni thei ngei ang.

ANGEL

   HLIMNA KAR AH 

Inchhung kan lut chu "in va rei ve a, in thil lo seng te lah chu a tam em em chuang bawk si lo a, nangni pahnih hi in chhuah deuh hian a hun awm ang ai a rei hi a ni ziah a, thil tha lo tih in nei a ni lo maw?" tichuan min lo chhaih ve leh nghal thuai a, Angeli chuan chhan ngaihna vak a hre lo a ni ngei ang, mi chhan dan tur a hriat loh a, a tih dan ngai te bawk chuan a nui hmel te chauh chuan a chhawn ve leh ta ringawt a.

"Nula Tlangval in zui chhuak kan ni a, a rei te pawh a rei ve deuh ang chu, lo chik viau zel su, a la rei telh telh dawn" tichuan ka nui deuh vur vur a, ka thusawi dan kal hmang vel atang chuan ka thiante chuan an lo hrethiam nghal a ni chek ang chu, an mitko an lo san leh ek ek tawh hlawm a, mahse Angeli ve thung chuan midang hmuh hlau tak si chuan min lo melh rum hle thung a.

A mit meng mawi tak te chu tum dang ai in a mawi zual bik hliah hliah hian ka hria a, meng rum ah chuan chutiang tak a duhawm a meng rum thei chu, a ni lo chu tudang mah ka la hmu mawlh lo ani, ka bul a rawn thu phei tur a ka hui chuan a lu a lo thing ringawt a, ka duh ang chhanna ka neih tawh tho vang leh a mitmei ka ven ber in min duh ve a, min hnar lo tih ka hriat chuan kei chuan zah tur vak ka hriat tawh lem loh avang chuan a bul ah chuan ka thu phei ta ringawt a.

"Nangni thil zar han seng dun chu kha in rawn va in ngai lut awm ve a, thutna sawn hial te a ngaih tak a" tichuan Remruati chuan min lo chhaih a, Angeli erawh a kûn nghal ringawt a, "kha nangmah vang vek mi nghal lutuk mai" zawi te a rawn ti sep pah chuan ka mal ah chuan a rawn chum a, a kut chu ka lo man sak nghal a, Remruati leh ka thiante mit fuk na ber chu kan ni ta nghal ringawt a, eng dang mah sawi lo chuan mi chu an en ringawt a.

Angeli chuan nuam lo a tih ka hlauh vang chuan a kut thlah pah chuan "aw.. nangni pawh ti ti bawrh bawrh tho ula, nge kha tia min en thap ,min hmuh ngun tawh tehreng nen min la hmu kham na nge?" nui deuh vur vur pah chuan ka ti a, nui deuh suk pah chuan an ti ti zawm ve leh mai hlawm bawk a.

Angeli nen chuan an ti ti chu kan lo ngaithla ve hi a ni ber a, a hma zawng a ka chanchin sawi ngai lo kha ka thiante chuan ka chanchin chu a mawi zawng in an han sawi tak tak mai a, min fakna leh Angeli lak a ka mark thatna atan an ti tih chu hre tho mahila a tul chu ka ti lem lo khawp mai, mahse khap hlek ila "mahni in fak duhlo mifel ania, tiang tak hi ania a thatna" ti zui nuah nuah chung chuan an sawi zui lui zel tho si a, ka thiante hi zawng an bul ah hi chuan mi diklo pawn an dikna an hriat miahlo chu ka thiante hian an dikna chu an hmuh lui sak thei zel hial hian nia ka rin thin ni, chhiat lai leh that lai pawh a kan kiang a rinawm tak a awm thin thiante hi zawng an hlu zual bik teh e.

Remruati ber pawh chuan a lo belh ve leh thin bawk nen a chang chuan awihawm loh khawp a fel ang lek lek te chuan min chhuah leh lawp lawp thin a, Remruati pawh hi hmeichhe tawng duh ve lam tak a ni bawk a, kawm a nuam in a tawng duh dan lah hi mi pawi a sawi lo in mi hlimna a siam sak fo zawk si a, ngai pawimawh tu leh thian tha tak tak pawh a ngah thin reng ani, nimahsela tawng duh na na na chuan lei ven sen loh chin an nei nge ni Jen chungchang a rawn zui lut zeuh chuan ti ti chu a ti tawp deuh der a, mahse thu dang chuan an sawi hnan leh vat nang a, an in veng deuh tham a, ti ti bawrh bawrh ngam an awm ta meuh lo a, chu erawh chuan kei chu min ti hlim phian lawi a.

Zan a rei ve tan ta bawk a, duh ang a an ti ti ngam tawh vak loh bawk vang chuan haw mai chu kan rawt ta a, Angeli chuan pawn a mi rawn thlah chu a zah tlat vang chuan Remruati zawk chuan min thlah a, nuam lo a tih thu te chu min hrilh ve mial mial a, mahse kei chuan eng ah mah ngai lo tur chuan ka ti ve mai bawk a.

Haw kawng ah chuan thiante chuan min fiam in min chhaih min chhaih ta nghal a, mahse an hriat duh ang na zawng chu ka chhang dawn lo tih an hriatchian vang ani ang chu zawhna erawh min zawt lem lo khawp a, a nghal fal deuh BJa chuan "eng nge inchungah khan in tih reng a?" nui vur vur pah chuan an ti hram a, "i ngaihtuah ang kha ani mai" ti zawng chuan ka chhang a, nui vur vur pah chuan "ka ngaihtuah ang te chu a pui lutuk" a ti a kan nui ho leh dar dar a, zan rei lam tawh a haw kan ni tih kan in theihnghilh hman lek lek hial ani.

In ka thlen ve leh chuan ka call nghal a, a pickup mai loh avang chuan a muhil tawh a nih ka ring a ka off leh ta ringawt a, bul kan tan zan atang a in muttui mumal hlei lo a min lo mutsan nghal ringawt chu ka vui ru hle a, mahse a lak ah erawh lan chhuah tir ka tum lem chuang lo a.

A hnu deuh lawk ah chuan min lo call ve leh thung a rang tak chuan ka lo chhang nghal thuai a, "I lo call lai kha bathroom ka hman lai ania, ka phone khum ah ka dah daih si a ka lo hre lo a" ti pah chuan a in thiam loh thu vel chu a sawi nuah nuah a, mahse keimah chu ka in thiam lo letling zawk hle a, kha tia a chhan pawh hre lo a keima duhdan leh ngaihdan ringawt a a chungchang ka lo rel fel a, ka lo lungawi lo ve ringawt te kha ka in thiam lo zawk hle a.

Darkar chanve vel deuh thaw kan in biak hnu chuan kan in muttui ve thei hram a, 'lawm loh a nui chu mi â' an tih ang kha chu ka ni chiang teh ang chu, ka khum ah chuan ka mu nui thu reng ringawt mai ani.

Hun chu a kal ve zel a , kan in ngaihzawn atang kar khat vel chu a liam ve ta der mai, mahse a rei a, ka hmu ngun in ka belchiang telh telh bawk a, a thatna te chu a nî tel in a zual zel zawk amaw tih mai tur chu ani, kan in ngaina in kan innel zual em em bawk a, kan mizia pawh a in mil ru phian zel leh nghal a, "tiang em em a in mil, unau ni awm zawk in ni" tichuan kan thiante chuan min fiam thin a, Ni e, Nupa pawh hi unau ni awm zawk tak pawh hi an awm ve chawk thin reng ani, Pathianin pumkhat tur a a ruat na na na chu in an viau chu thil awm lo a ni hran chuang lo alawm le.

Ka phone chu a rawn ri ral ral a, Sunday tlai a ni bawk a ka thiante min nghak ning tawh mi rawn call chu a nih ka ring nghal ringawt a, mahse Remruati zawk chu a lo ni reng a, tlai len an hman leh loh tur thu vel chu min rawn hrilh a, mahse engvang a hman lo nge an nih tih erawh a sawi chuang lo a, Angeli hian a theih ang chen chen chu ka tan a hun a hmang in min pe ve a, chutia a hman lo pawh chu a buai ve viau a nih chu ka ring ta ringawt a.

Ka thiante chuan mi rawn call mai loh a vang chuan an hman tawh leh tawh loh vel zawt tur chuan ka call a, mahse an ni chu an dan pangai te in Venghnuai lam ah 'Sunday tlai len ti nuam tu ah' an tih lam tur chuan an lo in zu thla leh tawh hi a lo ni zawk a, Angeli te an hman loh tur thu vel ka hrilh zawh chuan tlai dang a kan len fo na thin tlang ah chuan in nghak mai tur chuan kan in hrilh ta a.

Ka insiam peih tawh tho vang chuan keimah chuan tlang lam chu ka pan ve ta nghal mai a, tlang ka thleng chho chu a boruak chu a nuam in hah a ti dam sawng sawng thei hial hian ka hria a, Angeli chu hman ve se, in kai rial a kal dun a, a bul phul vel ah te chuan in si rial a thut chu ka chak tak zet a.

"Junior nangmah chauh in ami i len a? Khaw nge i thiante ho?" rawn ti tu lam chu ka hawi vat a, kan class ami Remruati thiannu Remsangi , an in kawm ngaih ve em vang a, 'Double R' ti a kan koh fiam mai thin chu a lo ni reng a, "Aw.. ka thiante an lo la thleng lo a, ka nghak lawk anih hi, nang tu te nen nge in len a?" tichuan ka lo chhang ve leh vat a.

"Remruati te ho nen kan nia, tlang liam ah chiah sawn an thu a, lo kal ve la i thiante nghah pah chu ani mai a" a ti ta mai a, Remruati khan mi rawn call in an hman dawn loh thu vel a sawi vang chuan kei chuan mak ka ti hle a, hrechiang tur chuan Remsangi chu ka zui phei ve ta ringawt a.

"Hei Junior ka lo hruai phei ve tawp mai ania, saw tah sawn amah in a lo awm a" tichuan Remsangi chuan a thiante kan piah deuh lawk mai a lo thu ho chu a va au deuh lung lung a, lo hawi phei thap in mi lo en deuh thup hlawm a, an zing atang a Angeli'n mak tih hmel deuh tak a min lo en chu kei pawh chuan ka va hmuh hmaih lo chiang kher mai, ka chhungril chu a sa chhuak vek a, thinrimna chuan mi kam nghal tun ni mai hian ka hria, mahse in thunun hram hram chu ka tum a, mahse a harsa tak zet ani, hmeichhe hlang chu ni se ka hrethiam mai thei e, mahse Angeli hnaih tak a mipa lo thu ve te, an bul deuh lawk a Rinmawia leh a thian dangte lo thu ve te chuan ka thin chu an tirim zual tak zet ani.

Kan thleng phei chu an lo ngawi deuh thup hlawm a, ka awm ve vang chuan nuam lo an ti tlang tih chu ka hai bik lo chiang kher mai, mahse Remsangi pawh hi a thiannu ang tho a thawveng leh vei nei lutuk vak lem lo anih vang chuan ka awm ve chu a pawina hre lem lo in min ko phei chu a ni ve ngei chuan ka ring a, "Hawh Junior ka bul ah lo thu ve rawh" tih leh thut hmun siam chu a rual deuh nghal mawlh mawlh a.

Remsangi chu a ti ti siam siam a, a nui leh uar uar thin, Angeli chu ka en leh zeuh thin a, za lem lo tih hriat tak a a nui te chu ka hmuh hmaih lo chiang kher mai, min lo en ve leh zeuh thin a, ka awm ve vang chuan an boruak chu ka ti nuam lo zo vek tih chu ka hriat vang chuan awm ve reng pawh chu nuam ka ti ta bik lo a, "ka thiante ho an lo thleng chho tawh ang a, min lo zawng palh ang" tih leh kalsan chu ka rual ta nghal a.

Bul kan tan a , tha tak in kan in zui amaw ka tih lai a, dawt min hrilh tih ka hriat leh mipa dang bul a ka hmu chuan ka rilru chu a ti na tak zet a, phatsan ni mai hian ka in hria a,ka tawt up up a, au chhuah vak mai te chu ka chak tak zet ani, mahse ngaihtuahna fim chu put hram hram ka tum a, ka chet zia leh hmel hmang ah chuan ka theih ang a nasa chuan ka thup hram hram a.

Rei vak lo ah chuan ka thiante pawh chu an lo thleng chho ve leh ta mai a, "Eng nge a awmzia Remruati te kha an hman dawn lo i ti si a, kan rawn lut kawi chhin a, 'Rinmawia te nen an chhuak tawh' anu in a lo ti leh bawk sia" tichuan Gabriel chuan mi rawn zawt nghal a, "Ka hre tawh bik nang" tih pah chuan ka lo nui lui vel a, "Hawh u vawiin tlai chu hmun dang ah leng teh ang u, helai chu a ninawm emai" tichuan hmun dang a len chu ka rawt ta tawp a, Rinmawia te an han hmu ve leh anih ngat chuan buaina a chhuah mai mai chu ka rin vang chuan engmah hre lo ang chuan ka awm a.

"Naaa rawn chhoh na ah pawh hah tawh nak lai a, chu lo ah a tlai tawh emai, lenna tur tak tak a awm tawh lo, khi a chhip ah khian han awm mai mai ang u" tih leh chhoh chu an rual ta mai a, eng ang pawn sawi mahila an kal dawn tih ka hriat vang chuan kan nih nih nih huam chuan engmah sawi lem lo chuan ka zui ve ta mai a.

"Khu, ta khu an awm alawm, dawt an sawi chiang anih khu, kan zu chhuk ve duh dawn em?" BJa chuan a rawn ti nghal mai a, rin ang ngei ngei in an rawn in in lawk tawh nen an thin chu a rim hma hle a, "Ni lo e, a ho emai, ti khuan awm mai mai rawh se, Junior hian a duh dan in duh leh zu ti se, keini ho phei chu in rawlh chi kan ni miah lo ania, Zu kan in leh nghal a, in tibuai pawh ni ila zu in zawk chu kan thiam thei dawn chuang lo, en liam rih mai angai nih khu" Gabriel chuan a rawn ti ve leh thuai bawk a.

"Min hmu tawh alawm, a ho lutuk tikhuan awm mai mai rawh se, ka tel lo pawh a a hlim theih te chuan chu bak bak a hlu a awm chuang hleinem" ti pah chuan ka nui lui der kual vel a, mahse ka thiante mit meng a min khawngaihna chu ka hmu thei a, "zia lo hle mai, zu kan lo in khanglang a, tiang tur tih hria ila kan in miah lo tur ania, rui lo mahila thiam kan chang dawn si lo a, chubak ah kan in ti mualpho mai mai zawk dawn sia" ti pah chuan an in thiam loh thu chu an sawi nuah nuah hlawm a.

"A ho e, chhuk ve teh ang u, eng tin mah ti hmasa lo ila, min lo tihbuai leh kan thiamloh ani tawh hleinem" ring deuh hlek a ti pah chuan BJa chu a chhuk ta nghal mai a, rang tak chuan kan zui thla ve nghal mai a, BJa tawng chu an hre thei tih hriat tak chuan min lo en deuh thap bawk a.

ANGEL

   BEISEI LOH LAM

Ni pawn thlang tlak zai a rel ve ta bawk a, zanriah ei kham chuan insiam peih hma tak chuan ka thiante sawm kual tur chuan kan in chu ka chhuahsan ta a, min chhanna tur hriat chak a nghahhlelh luat tuk vang chuan hma leh hma lo pawh ngaihtuah lek lo chuan ka chhuak ve ta tawp tawp kha ani a, kalkawng a ka mi tawh thenkhat te chuan mak min lo ti zawk hial a, zan lam chhuah chu sawi loh tun ang em em a hma ah hi chuan ka chhuak ngai miau lo a, a awm lo hran chuang lo.

Angeli hmuh vat vat chu ka chak rual chuan ka huphurh ru hle bawk a, dik tak chuan ka chanchin tiang tak khan Remruati hnen atang a lo hre tawh a nih chuan min duh let ve chu ka ring hlawl lo ani, mahse mahni tawk a in la pa ve tawk tak ka ni bawk a, ka nih tur lam chu a chhia emaw tha emaw nih vat vat a, zawh vat vat duh mi ka ni a, huphurh ru viau mahila rilru kap reng a awm ai chuan len vat vat chu ka duh zawk ani.

Gabriel te in ka thleng phei chu an chaw ei kham chu sitting room lam ah an lo thu khawm mek a, mak min tih hmel tak a min lo en te chu ka hmuh hmaih lo chiang kher mai, Gabriel chuan ka rilru put hmang hrethiam ni awm fahran hian "tikhan lo thu la, kan in siam ve vat vat ang e, ka rei lo ang" tih leh nui vur vur chung a bathroom lam pan chu a rual ta nghal mai bawk a.

"Tunlai chu zan lam ah hian i rawn va lawr hma thei ve a, khaw nge maw in len thin aw, in rawn haw tlai thei ru riau mai bawk sia, kan veng ah chuan a nih hmel si lo a, khaw nge in va len thin a?" tichuan Gabriel nu chuan mi lo be vat bawk a, "Ni e, in rawn haw tlai thei riau mai a, len chin tawk te hi hriat tur ani a, chubak ah in len na nu leh pa te leh ai u zawk te mit ti kham zawng te hian awm loh hram hram tur ania aw, hei in tlangval ve chho tawh a, tiang nun lai vel tak hi a dik loh chuan kan chanchin hi a mawi thei tawh ngai lo ania, nun uluk hun tak ani tih hria ula mi zing ah awm dan thiam hram hram tur aw" tichuan apa chuan a lo tui hnih ve leh zeuh bawk a.

"Khawi ah vak pawh kan leng ngai chuang lo, kan tei kual ve deuh mai mai ani ber e" ti chauh chuan ka chhang a, "nute a ti ve mai mai anih kha,Vengthar lam ah an leng thin alawm, thawveng deuh mai an rim thin" rawn nui lut deuh vur vur pah chuan Jen chuan a rawn ti a.

"Vengthar lam phei chu zan rei lutuk ah rawn haw lo ula, zu rui nawi  mai mai an tam thei si a" ti a Gabriel nu rawn sawi chu "khai chutiang zawng ah chuan mipa an nia lawm, mahse tumah hi tihbuai hmasak tur ani ngai lo ania, a hun ah chuan tlawm ngam mai tur, 'khawvel hian midang hnehtu hmuh a chak a, mahse Pathian chuan mahni inhnehtu hmuh a duh thin' an tih kha hria ula, tlawm ngaih hun ah chuan tlawm tur, nimahsela a hun ah chuan mipa chu mipa tak a awm ve ngam tur ania" tichuan a pa chuan a lo ti ve leh nghal a.

"Nia pate ngaihtuah duh suh u, an ni thianho te chu in sual an hrat lutuk, insual pawh an thiam tawh ngawt ang chu" tichuan Jen chuan a rawn ti ve leh a, an nui deuh vur vur hlawm a, Jen hmel chu ka lo en reng thin a, a hmel a nui hmel chu a phuahchawp ngawih ngawih hian ka hria a, mahse chutah chuan ka buaina awm ve in ka hre bawk silo.

Jen leh Gabriel Nu leh Pa te an titi ho lai te chuan Jen chu chik tak hian ka lo en a, mi rawn melh ve leh zeuh thin a mahse ka lo en deuh kar thin vang nge ni a hawisan rang thei kher mai, a nui leh deuh suk thin a mahse a nuihzat vang a nui ni lo in, a mawi a nui ve mai mai chu a ang em em mai a.

"Nang hi eng nge i rawn tih dawn de du a? Ka nei lo ka tih kha, va haw tawh rawh" ti a Jen rawn melh kar pah chuan Gabriel chu bathroom lam atang chuan a rawn chhuak phei a, "ka awih lo lutuk, khawi maw min lo pe ve mai mai teh" ti a Jen chuan chhang pah chuan Gabriel room lam ah chuan an in zui lut phei a.

Rei vak lo ah chuan an rawn in zui chhuak ve leh mai bawk a, Jen chuan nui vur vur pah chuan "hei nute a nei ka tih reng kha, in fapa hi chu a uikawm mah mah alawm, ka neih ang ang ka hman tir a, a neih ve lah in a in zep tlat a" ti pah chuan paper chu a rawn lek kang vaw vaw a, "ka duh ber ka hmu ta bawk a ka haw nia aw, muttui u" ti nui vur vur chung chuan Jen chu a chhuak ta a.

Keini pawh rei vak lo ah chuan kan chhuak ve ta nghal mai bawk a, kan thiante chu sawm kual kher lo a, Phone mai chu tha in kan hria a, Gabriel chuan a phone thuai a, mahse an ni chu Remruati te in ah an lo thu fel diam tawh zawk hi a lo ni a, kan sawm hman ang tih mawlh chu kan hlau leh hnuhnawh hle a.

"I insiam rei lutuk a, kha min lo va sawi khalh leh vek dawn anih kha, a hrim hrim in a changtupa lo zawk tur i nalh zawk hrim hrim a" ti chuan ka vui der vel nawk nawk a, "taka Jen khan eng atan nge Paper kha a dil che a?" ka ti zawm leh nghal zat a.

"Nang hi Jen nge zanin a Angeli chhanna tur i ngaihtuah zawk?" 

"Ka ngaihtuah ve ve a" nui vur vur chung chuan ka ti a, "kei chu ka hre lo ve ve" tichuan nui vur chung chuan mi lo chhang ve vat bawk a.

Remruati te in pawh chu kan thleng vat a, Kan thiante pawh an lo then leh thaw tawh a, mahse beisei loh lam daih Remruati nu leh pa pawh an lo thu ve kur bawk a, misual leh hrawn hreawm an ni em tih pawh ka hriat hma atang chuan ka tum ang a ka awm na tur min dal tu tur an ni tih ka hriatchian sa avang chuan luh hlim atang ringawt pawh chuan hnawk ka ti ru nghal em em ringawt a.

 David leh BJa te chuan an kawm ve mial mial lawi a, mahse in la upa fahran a ram buai lai hre pha ve ni awm tak a ti ti an vawrh leh zeuh thin erawh kan lo ip ru leh deuh chawih thin a, mahse chu chu Remruati nu leh pa chuan an lawm hmel fu lawi bawk si a, rin ai tak chuan an in kawm thei ta phian a.

Angeli leh Remruati pawh an lo nui ve leh deuh suk suk thin a, kei leh Gabriel erawh lo ip ruk leh deuh chawih thin chu ani mai a, sawi tur vak pawh kan hre ve ta thin lo a, dik tak chuan sawi tur hre lo bik pawh chu kan ni chuang lo, mahse kal hma a Gabriel pa thu mi chah leh in lak changtupa deuh hlek duh vang chuan kan ngawi deuh mai mai zawk a.

Angeli chu ka hma zawn tak ah chuan a thu a, mahse ka ding lam sir a BJa leh Davida te ti ti tih vel lam chu a thlek leh dauh dauh thin a, mi rawn en ve leh zeuh thin tih mai lo chu kan lam chu a rawn hawi phei meuh lo a, kan boruak tawn in zir in Remruati nu leh pa hi chu awm ve lo zet se zawng an ni ti ti a en reng chu ti tawp tur in a bul ah ka va in sawn phei ngei awm si a, mahse in sawn phei chu sawi loh ka bawp tak ngial pawh ka khawkherh ngam rih der si lo a.

An vanglai a an lo tawn ve tawh ani a an hrethiam nge ni dar 8 a rik chuan mut pawh la chhuah hmel der si lo kha mu tur chuan an room lam chu Remruati nu leh pa te chuan min pan san a, dik tak chuan an mu har chu ka ti zawk ngawih ngawih a, nileng a lo nghak a, zan hma tak a chhuak ve vawk tan chuan an ni vang a ka thil nghahhlelh ka nghah reng ngai kha ka ning tak zet a, David leh BJa ti ti vawrh lutuk pawh kha ka ngei hman lek lek hial ani.

Room ah an lut fel a, an mu fel vel awm ang tih ah chuan rang tak chuan zahthei loh chhuah chuan Angeli bul ah chuan ka in sawn phei ta nghal thuai a, a lo tawm deuh nghal chawih a, a lai ru ve hle tih chu ka hre thei mai a, Remruati leh ka thiante ho lo nui vur vur chu a mit sir deuh zuk zuk a, chu chuan a ti lai zual nge ni a biang chu a rawn sen deuh tan tan a.

Angeli chu a zah lutuk ka hlauh vang chuan ka thiante chu ka mit sir zeuh a, an lo hrethiam rang ve khawp a Remruati bia chuan thil eng eng emaw chu an sawi ho nak nak hlawm a, chung an ti ti lai kar ah chuan zawi deuh sap chuan "Angel vawiin ni leng in ka nghak tawh a, i chhanna chu eng pawh ni se tunah hian min hrilh tawh la, ka hre chak tak zet tawh a" tichuan Angeli chu ka lo be ve bawk a.

Midang chu a veng thawng tih hriat tak chuan a hawi kual deuh zuk zuk a, "rei lo te chu lo la nghak leh la, i hmanhmawh emai" nui deuh suk pah chuan a rawn ti a, thil dang a luhlul ve tak ni mahila, hmeichhe lam ah hi chuan ka beidawng hma ve hrim hrim nge ni hnawl na thu awm miah lo mahse mi ti hnual deuh nghal a, zawh nawn leh pawh chu ka phur tawh lo tak zet ani.

"Taka Mami in chung a thawmhnaw zar kha ka la seng miah lo, han seng lawk la, junior han kal pui la, a eng nep si a" ti a Remruati rawn sawi chu ka tan chuan chu tluk a kha mi hun lai a hun duhawm kha a awm kher awm chuang lo ve.

Angeli nen chuan in chung lam chu kan pan chho dun ta nghal a, in suk zar chu a seng mawlh mawlh a, a ban ah chuan ka va man deuh chawt a, rang tak chuan min lo en ve nghal kalh a, "aw emaw aih pawh ni se sawi tawh rawh le, tunah chuan ka nghak thei tawh lo ani" ka tih chuan sawi tur hre lo chuan mi en ringawt a, "ka ban i vawn na hi thlah phawt la, mi in min lo hmu ang e aw" a rawn tih leh phei chuan a tha lo lam lo beisei ngar ngar sa tu ka lo ni bawk nen beisei chu a sang tawh lo hle mai.

"Hnarna thu a sawi loh chuan a hnar phal lo che a, mahse pawm harsa a la ti ve bawk si tih na ani a, chu tah chiah chuan i  luhlul chhuah la zawt nawn leh ngat thin la, a chhang ngei ngei ang che" ti a kal lam a Gabriela'n thu min chah chu ka hrechhuak zawk a, a ban ka vawn na pawh chu ka thlah duh ta lo a, "Min chhang phawt la chuan ka thlah ang che, tunah chuan i chhanna chiah ka hre duh thudang ka hre peih rih lo ania" ka tih leh chuan sawi tur chu a hriat loh hmel tak zet ani.

"Ka duh che lawm mahse..."  A tawp deuh chut a, "eng nge 'mahse'? Sawi tlang law law la, ka tan a la harsa ania" ka lo tih zawm ve leh vat bawk a.

"Min thlah phawt la"

"Aih... Ka hriat duh ka hria ang a, chu mi zawh ah ka thlah chauh ang che, mi min hmuh  i hlau tak tak anih chuan sawi vat vat la"

"Ka duh che... Ka hmuh hmasak ber ni tang khan ka duh tawh che tichuan a tawk em?" 

Beisei loh lam ah thu lawmawm ka dawn chuan min ti hlim tak zet a, a kut ka vawn na chu thlah a hnek in nghet tak a chelh chu ka chak ani, "ti khan sawi mai tur ania, sawi kual leh mi nghah tir vak kher a tul hleinem" ti a nui vur vur pah chuan ka thlah ta a.

"Imm i hre tawh bawk a, thawmhnaw min seng pui tur i nih kha min lo seng pui nghal rawh luhlulpa" ti a lungawi vak lo tawngkam awm tak a a tawng te chu a duhawm zual ta bik hliah hliah hian ka hria a, nui deuh vur vur pah chuan ka seng pui ve nghal a.

Kan seng zawh chuan kan chhuk lam step thim lai deuh ah chuan ka kuai ding a, eng dang vak sawi lo chuan ka fawp ta nghal ringawt a, min lo dang lo a, min lo hnar bik hek lo, mahse min chhan let mai loh dan ah a hrilh chu a hai ve hle ani ngei ang.

ANGEL

           DUHNA

"Ka chanchin hriat loh tam tak i la neih ka ring a, chung chu hre phawt la chu ka duh a, mahse 'ka duh che' tih hi hre hmasa phawt la ka duh a" ka zam hmel leh ka zak chu thup hram hram ka duh a, mahse chung hmu tur pawh chuan a ni chuan en pawh min en ngam bawk si lo, a nui leh deuh sak thin a, mahse a nui hmel mawi em em chuan ka tan thu lawmawm nge lawmawm loh a ken ka hre bawk si lo.

"I chanchin vel chu Jennifer i sawi na anih chuan 'ka hre vek tawh' ka tih kha" a rawn ti chhuak ve hram a, mahse a thu rawn sawi chhuah ve awm chhun chuan ka din hmun a ti lai telh telh zawk bawk si, hnarna thu ni bawk si lo, pawmna thu a ni bawk si lo, hrethiam a har in sawi zawm tur mai pawh chu ka hre tawh lo hle a.

In chu kan thleng leh chu a ni deuh der mai a, kawng tawi lutuk mawlh mai chuan ka lung a ti awi thlawt lo ani, engmah sawi na hman a awm vak tawh bawk si lo a, ngawi reng chuan in ah chuan kan in zui lut ta ringawt a, ka thiante mi rawn mit sir vel chu kei chuan ka lu ka lo thin khum ringawt a, tih ngaihna vak chu an hriat loh hmel khawp mai.

"Dawr kha an lo sawn nge hmun dang ah in lei zawk ni ang aw" ti a Remruati mi lo fiamna chu "Angeli hian pen kawi na tur a hre reuh lutuk a" tichuan ka lo chhang ve leh nghal ringawt a, "naaaa van awihawm loh tak e aw, i thil lei tur i hre lo a, i ngaihtuah leh laklawh vel anih kha aw, mi puh reng reng suh" nui sen sen pah chuan a rawn ti a, "ka lei duh vel te chu kal lam ah pawh ka hriat vek kha,ka hrilh nghal vek che kha a" ka lo tih ve leh chuan a ngawi zui deuh hmak a, a lai hmel hlei hlei hi ni tha thin chu ni.

"Chu thubuai deuh a awm a va ang ve a, kal dun reng si thu a va rawn in ang ta lo ve, in rawn in tibuai chho em lo maw?" nui pah a Gabriela'n a rawn tih chuan, Angeli chuan mi rawn melh zeuh a, mahse ka lo en deuh kar vang chuan a hawi let leh rang kher mai.

Remruati chuan min lo hmu leh kar tawh a, mit mi lo san khum leh zeuh zeuh thin, a nghal lutuk hi chu a chang chuan a ngeiawm lek lek thin, "Mami thingpui i in leng te hi va lum la, ka in leng te pawh an ni ve si lo a" tichuan a nui leh har har a, a hnung a rawn ben deuh zeuh pah chuan "eng nge maw i in leng kan nih loh na bik aw, nula pahnih kan rawn rim kawp che u alawm le" tichuan David chuan a rawn ti ve leh a, nui pah chuan Angeli pawh thingpui lum tur chuan choka lam a pan phei ve nghal thuai a.

A nui reng mai te chuan a hmel hmuh a ti nuam in min ti hahdam deuh sawng sawng hian ka hria a, choka lam a a phei pawh chu ka en zui deuh vawng vawng a, "eee i ring kha i  herh ang e" ti a Remruati'n mi rawn fiam leh chuan ka hawi let rang kher mai, "ee saw lam saw ni maw in choka lo ni a?" ka tih chuan sawi tur pawh an hre lo an nui ringawt hlawm a, "aw nge maw an choka awm na ka hre lo ni ve mai a, nuih tur a awm em ni?" in la thu tak deuh hian kan ti leh a, mahse chung hlei hlei chuan an ni chu a tih nuih tam tir zawk amaw tih mai tur ani.

"Hriat sa hi chu in zawt lo ila a tha, 'Mami kha ka thlir zui alawm' ti law law la kan nuih pawh a za nep zawk ang" Remruati'n a tih leh chuan sawi tur a vang duh tawh ngei mai, ka sawi chhuah leh ka hrilh kher pawh ngai lo in ka awm dan vel a tang chuan ka rilru pawh an hrethiam ngei chuan ka ring, mahse a pawi ka ti em em chuang lo, 'hre sa in dawr ah pawh engmah lei tur nei lo ka thianten min tirh dawn pawh khan an in thlawp tha hlawm bawk alawm le, zahna chhan tur vak engmah a awm tawh hleinem' tichuan mahni ka in hnem a, mahse an ni lak a lo buai leh lo in hnem vak vak ai chuan Angeli rilru put hmang tur ka ngaihtuah chuan ka buai in in hnem chu ka mamawh zawk tak zet ani.

An sawi laklawh chuan an sawi reng ang a ka tan a nuam lo ang tih a hlau nge ni Gabriel chuan thil dang chu a lo sawi thuai a, min ti zangkhai hawk in ka hria , thil ho deuh deuh sawi in an nui an nui leh tawh a, mahse a kar lak a mi rawn kah leh zeuh an ching erawh chuan sawipui pawh min ti chak lo zo vek, Angeli thingpui lum te chu ka ngaihtuah a "thingpui lum te vil vak a ngai em maw ni aw? Lo phei se nakin ah a so hun ah a va phei leh mai dawn a" ti te chuan mahni chuan ka lo vui ve em em a.

Mahni ngaihtuah na kawm a ka lo awm melh melh lai chuan Angeli pawh thingpui sem in a lo phei ve der a, thil dang pawh en lo chuan amah chauh chu ka lo en leh deuh nghal ngar ngar mai a, ka beisei na mai mai nge chu ka hre lo, mahse a ni pawh chuan mi rawn mit sir ve leh deuh zeuh thin hian ka hria a, chu mai mai pawh chuan min ti nui leh vur vur ringawt thin .

"Eng nge i nuih vur vur bik a? Sawi law law la nui ho vek ang u" Remruati chuan a rawn ti leh a, mi lo en leh kar tawh a ni ngei ang chu, ka thiante pawh chuan lo tui hnih ve leh thuai in min sawi chhuah tir chu an tum ta tlat a, kei lah nui deuh var chauh chuan ka chhang a, ka chhan let ve chuan Angeli awm lai ngei ngei hian min fiam in min chhaih vak ang tih ka hlau ani.

An tum ang leh duh ang a ka chhan tak mai si loh avang chuan thil dang chu an sawi leh ta daih a, tlai lam a an sawi hmabak leh nuam an tih em em Angeli tihder pawh an tan leh der tawh a, mahse chu chu ka tan chuan a nuam tak zet ani, a nui hmel chu ka lo thlir reng zel a, a ti nui tu leh a nuih chhan ni lo mahila a nui hmel hmu thei ringawt a ka awm pawh chu a nuam tak zet ani, a nui hmel chu en rei pauh leh en a kham awm dawn lo amaw ni tih mai tur chuan en kham tik reng reng a awm thei lo a, ka en ngawih ngawih reng ringawt mai ani.

Remruati nu te inkhawm bang rawn haw chuan sana en na chang min ti hrechhuak ve chauh in kan haw san ve ta a, haw kawng a min chhaih leh thin te chu nin hmel tak chuan awm thin mahila dik tak chuan nuam ka ti ru em em a, min chhaih ringawt pawh chu ka hlimpui tawk em em zawk ani si a, Angeli rilru put hmang chu hriatchian ve thuai thuai chu ka chak tak zet ani, "a duh che lawm, a awm dan vel tang khan ka hrethiam vek" tichuan ka thiante chuan min hnem ve bawk mahse Angeli ka ngei atang a ka hriat a nih loh vang chuan ka awih thei tak tak chuang lo a.

Mut lai te chuan thil dang reng rilru ah a lang thei lo, ka mut a chhuak lo a ka ngaihtuah awm chhun chu Angeli chauh chu a ni tawh mai, muhil thei lo a darkar chanve vel zet ka khum a ka in leh kual ka in leh kual tak ah chuan call tawp chu ka duh a ,mahse ka inthlahrung ve deuh bawk si, mahse rilru put hmang engkim a hre tawh bawk a, bak ah hmai chhan ai chuan phone call atang a ni pawn a sawi ngam zawk ka rin vang chuan ka call ta tawp a.

"Hello" ti a a aw zangkhai vah mai a min lo chhang te chuan min ti hahdam sawng sawng in ka hria a.

"Aw.. Hello i lo la mu lo maw?"

"Immm mu lo deuh"

"A tlai tawh viau na a zanin a kan thil sawi kha kan sawi zo hman ta si lo a, sawi chhunzawm ka lo tum a, a pawi ang em?"

"Aaaa.. pawi chuang lo e, sawi la"

"Ka rilru put hmang engkim chu kha i hre vek tawh a, ka duh tak zet che tih pawh i hre tawh bawk a, i hriat atan a ka duh ka chanchin vel pawh i hre tawh tho bawk a, tunah chuan nangma min ngaihdan hriat ve ka duh a"

A ngawi vung vung a, min ngaihdan chu eng tiang pawh ni se sawi chu harsa a ti hle a ang, a thaw leh halh thin a, ka ngaih chu a tha zan tawh lo hle mai, "sawi inthlahrung lo la, engtiang pawh ni se sawi tawp rawh, engtiang pawn min ngai la chu chu kei chuan hriat ka duh a a ni mai" tichuan ka ti leh ta tawp a, eng pawh ni se rilru khingbai tak a awm reng ai chuan kan nih tur ang nih mai chu kei chuan ka duh zawk ani.

"Ihhh dik tak chuan kei pawn ka duh che lawm mahse" a tawp deuh chat a, nui chhuak ang tih hlau tak si rilru thawveng ru tak chuan "eng nge'mahse' sawi la" ka lo ti ve thuai  bawk a.

"Jennifer nen in chungchang vel ka hriat dan in, in in kar tha lo vel hi i tuar hle ni in an sawi a, chu mi i tuarna hliah khuh nan mai mai chauh min hmang ang a min thlauh thla leh si ang tih hi ka hlau a" a rawn ti a, chutiang zawng chuan a ngaihtuah ang tih reng ka lo ngaihtuah lo a, chhan thiam pawh a har ka ti hle a, mahse ka rilru dik tak chu engkim chu hrilh chu tha in ka hre ta a.

"Nia Jen nen kan chungchang ah kha chuan ka rilru chu a na ve tak zet alawm, Jen leh nang hi ka khaikhin ngai lo che u a, a chhan chu a ni chu ka hun liam tawh a mi ani a nang chu ka tun hun ami i ni, ka rilru na hliah khuh nan mai mai ka hmang dawn che nge dawn lo che tih  pawh ka hre lo a, a chhan chu i kiang ah natna ka neih ve ngai lo vang ani, ka thlauh thlak che i hlau maw? I sawi ang a ka natna hliah khuh a ka dam na lo ni ta tehreng pawh ni la, ka damna chu ka hlauh phal tawh dawn ami? Jen bul a ka awm zan pawh khan ka ngaihtuah che nge ngaihtuah lo che chu ka hre lo mahse, i kiang a ka awm kha chuan Jen hi ka ngaihtuah ngai lo hrim hrim"   a nui deuh suk a, "eng nge i nuih a?" ka ti leh thuai bawk a.

"I zei ve hrim hrim nge i rilru dik tak tih ka hre si lo a" a rawn ti leh hram a, a khirh zek dawn tih chu ka hrethiam mai.

"Ka rilru dik tak ka sawi, mahse min rin leh rin loh chu i thu thluk na tur ania, sawi theih ka nei ve tawh chuang lo a"

"Ka ring che lawm, i thiante ang in dawt sawi kual in min fiam kual ve ngai loh vang aniang ka ring lutuk che" nui deuh chung chuan a rawn ti a, chu tluk a ka tan a lawmawm chu a awm chuang lo ani "mahse ka rilru ka la siam fel thei lo ani" a rawn ti leh a, ka rilru chu a buai ru hle a, sawi tur vak ka hre tawh bawk si lo.

"Awle lo in ngaihtuah la chuan naktuk ah min hrilh leh mai ang a"

"Imm awle "

"Nih chuan Muttui aw, tha deuh in lo in ngaihtuah la"

"Awle tehreng mai, muttui le" 

Min duh ve tih ka hre tawh a, mahse chu chauh chu a tawk zo bawk si lo, a tuk a thil thleng tur Ngaihtuah ran chung chuan ka mu ve ta a.

Ni khi mal tak a a awm vang in a en na a hlauh phah loh a, a chhuah a thulh phah hek chuang lo , chu ni eng mawi tak chuan ka room a ka mu lai chu mi rawn chhun tho in ka phone chu ka check vat a, mahse ka beisei ang message te chu hnut chhiah a lo awm chuang lo a.

Ka tan va nawr vak a nuam tawh si lo, message leh call lah chu chhun thleng chuan ka dawng bawk si lo , thil dang ngaihtuah vak ka duh ni ah ber lah chuan ka thiante chu an reh ngawih ngawih mai bawk si, nidang a an rawn bengchhen theih tehreng nen, ninawm khawp khawp in an rawn bengchheng a, mahse tun hun ah zet zawng an reh ngawih ngawih mai ani.

Ka phone chu a rawn rik hlek chuan hmanhmawh tak chuan ka en nghal thuai thuai zel a, chu ti tak a thil nghahhlelh chu ka la nei ngai reng reng lo, mahse ka nghahhlel luat tuk vang nge ni ka beisei ang leh duh ang reng reng chuan engmah a thleng thei bawk si lo, ni te chu in her liam a tum tawh lo emaw tih mai tur chuan a kal muang ruih mai te chuan ka hria a, "zan lam thleng vat vat se" tih chu ka duhthusam a ni ber tawh mai.

ANGEL

      THIAN ATANG

"Rawn chhoh leh ka tum a mahse in lo nui dun ker ker bawk si a, rawn tel ve pawh kha a in thlahrun awm lutuk a, ka lo chho ve leh ta lo mai anih kha aw Angel" tichuan Gabriel chuan a lo chhoh tawh loh chhan chu chhuanlam a lo siam nghal thuai a, mahse rawn chhoh leh tum in a chhuk lo hrim hrim tih chu kei chang ni lo in Angeli pawh chuan a hai bik der si lo.

"Ka va awih kher kher lo tak, rawn chhoh i tum tawh lo hrim hrim tih chu ka hre ve vek aw" ti pah chuan a nui deuh sen sen a, "Kha tin en vung vung zel suh, i mawl hmel lutuk" ti a zawi deuh sap a BJa mi rawn hrilh chu runlui deuh chuan kan en lui deuh vak a, mahse ka ti fuh viau lem lo Remruati chuan mi lo hmu ve reng hi a, min lo nuih vur vur reng tawh a, ka in siam tha rang kher mai.

"Kha ka tih reng kha , thu hi awih ve mai zel tur hi nia" ti a BJa mi rawn hrilh nawn leh chu "nangmah vang vek" tih leh kut in thlak fiam chu kan rual leh ta nghal mai a, "Tlangval in Nula in len pui ve tih kha theihnghilh lo ula, zia thup aw" ti a Davida rawn au deuh chuan min ti tawp chiang kher mai.

Haw kawng ah te chuan Remruati chuan mi rawn nuih leh vur vur thin a, kei lah hre lo ni awm tak in ka kal hmiah hmiah lawi a, Angeli pawh ka thiante dawt sawi chu awih tur nge awih lo tur tih pawh hre lo in Remruati bul ah chuan "ami?" a rawn ti leh ngawt zel mai bawk a, ka thiante hian mi an thil la hriat loh awihawm loh deuh si, awih loh ngam ni chiah si lo a dawt hmang a mi fiam leh chhaih vel hi an hrat ve hrim hrim a, mahse hei tak hi an bul a awm ti nuam em em tu a ni ve leh bawk a.

Angeli pawh chuan a nel ve sawt tawh khawp a, fiamthu an duh bawk a, an nui reng a an bul a awm chu a hahdam thlak bawk em a nel chu an awm ve khawp ang, "Mami hi i duh em ni a? Ka lo sawipui dawn che ami?" ti a Remruati mi rawn zawt thut chu chhan thiam a har ru ang reng hle mai.

"Ka duh nge duh lo ka hre lo, mahse duh pawh ni ila sawipui chu ka duh kher lo" ti pah chuan ka nui deuh sak a, "i in la pa eng emaw kual vel ve reuh sia, hmeichhe thenkhat chuan tiang hi an duh lo zawk ania" .

"In lak pa lam ani lo, midang fak mawi chawp ngai hi chu a dik thei lo alawm, ama min hmuh dan tur zawk kha ania, chu bak ah hmeichhia vang in ka mizia thlak vak ka tum lo, ka nihna ang a min pawm theih loh chuan a tawk ani mai" 

"A ve ngei che chuan a, mahse Jennifer" a tawp hmak , sawi a inthlahrung ve deuh a ni ngei ang,  "Eng nge Jen chu?".

"Engmah a ni leh lo a ho emai a, ka sawi peih tawh lo e a" tih leh ka thiante ho va zawm in an zing ah a va bengchheng ve leh nghal a, a sawi tum te chu ka ngaihtuah a, Jen vang khan ka mizia kha ka thlak hlawk hlawk zel a, vawikhat mai ni lo in vawi tam tak a tan chuan ka thlak thin, hmeichhe dang bul ah mipa ngeiawm leh tawngthei tak ka nih lai in,Jen bul ah erawh mipa nelawm leh cool tak ka ni leh thung a, mahse a bul a chutia ka awm vang chuan midang bul a ka mizia kha a hre lo tih na a ni chuang lo, ka tan a mi special bik tak bul a danglam ka tumna leh ka zia dang te chu pawi tih na ka nei chuang hek lo, mahse Jen nen kan in kar a buai tak hnu khan thil tam tak ah ka rilru ka thlak a, midang bul ah tha tak in awm mahila ka chhungril tam tak chu a inthlak ve reng zel ani.

Angeli te unau kan thlah zawh chuan kan haw ve leh nghal a, haw kawng ah te chuan chanchin min zawt sap sap a, mahse Jen nen kan chanchin vel a hria a, ka zak a engmah ka sawi loh thu vel ka sawi chuan rin lawk ang ngei ngei in min deu leh em em a, "I ngam lo anih kha, Keiman ka ngam alawm le" ti a BJa rawn sawi chuan an lo thlawp pui leh hle tawh a, kei lah in "Nia pawi chuang lo" ka lo ti sam et mai bawk si.

An rin ai a ka bansan awlsam leh zawk vang nge ni, min fuih a tih dan tur min hrilh reng a, ka ngaihzawn loh chuan an tan a pawi ta emaw tih mai tur khawp in ngaihzawn tir min tum leh tlat tawh a, zan lam ah len leh nghal an sawi a,"kan lang mawlh mawlh lutuk lo maw? A zahthlak ania" ka tih chuan "hmeichhia leh uite" tih zawng chuan min lo chhang ve leh thuai bawk a, zan lam a len leh chungchang vel kan sawi zawh chuan kan haw darh ta hlawm a, len an sawi lai a peih loh hmel ber khan dik tak chuan len thuai thuai chu ka nghakhlel tawh ani.

Chaw ei kham chuan uluk tak a inchei in ka thiante mi rawn sawm pawh nghak zo tawh lo chuan rang tak chuan ka chhuak nghal a, Gabriel te in lam chu ka pan nghal a, "Khaw nge i len dawn a? Kha i va nalh reng reng ve a" ti a min lo be tu Jen chu chhan ngaihna vak chu ka hre lo hle a.

"Ka hre lo le, Gabriel te in ah hian ka kal phawt ang a, chu mi zawh ah kan la rel ang chu" ti in nui vur vur pah chuan ka chhang a, mahse a awih vak lo tih chu ka hre mai a, "a awihawm chiah loh, Remruati te in lam ah a ni lo maw? Tunlai chu in leng phei ngun an ti ania aw" ti chung chuan a nui vur vur a, midang min fiam na chu ni se ka nuih liam pui ve mai tur hi a ni a, mahse midang ni lo in ka nun a hmun pawimawh tak lo luah tawh tu Jen ngei mai kha a ni si a, nui ve vur vur mahila ka nuih chu a za mawlh lo ani.

"Tu nge lo sawi a?" tichuan zawt ve mahila Rinmawia chu a nih ka ring ve nghal ringawt a, mahse Rinmawia nen an in biak thin awm ka hre si lo, mahse an in bia emaw be lo emaw ka sawi theih a awm lo tih ka hre bawk si, Jen nen kan in kar ah engmah awm lo mahse Rinmawia leh Jen ka ngaihtuah kawp hi chuan ka thin hi a la rim em em zel tho ani.

"Tu emaw te te in" ti a nui leh vur vur chung a min chhanna chuan rinhlelhna min pek belh leh in ka nuih chu a za lo tak zet tawh ani, ka len phurna te chu a bo a, mahni a in a awm a mut leh mai mai chu a ni ka chak leh ber tawh ni.

"An ti ve mai mai anih chu, a nih leh ka kal phawt aw" tih leh Gabriel te in lam pan chuan ka kal ta nghal thuai a, Gabriela pawh a rawn chhuak ve leh chiah bawk a, an in ah pawh lut ta lo chuan Davida te in lam pan chuan kan kal ve leh ta nghal mai a.

"Jennifer khan Remruati te kha a thik a nih kha" a rawn ti chhuak thut chu kan thusawi zawng zawng a lo hre ve vek tih chu ka hre nghal mai a, "a awihawm loh emai a, thikna chhan tur a nei hleinem" ka tih chuan a nui ringawt a, "i va â tak e aw, Jennifer hi i hrechiang ber ang chu ka tia, mahse i lo hrechiang miah lo anih kha, a hmel awm dan leh a awka vel atang khan i hrethiam ve mai lo a maw ni aw" a rawn ti leh a.

"Kan thusawi kha i hre satliah mai ni lo in , min lo hmu vek ani maw?"

"Hmu e a, a biak tirh che a, i chhuanlam siam kan lenna tur i hriat loh thu i sawi vel pawh kha a awih lo lutuk tih a hmel ah khan a hriat vek alawm, taka nang chuan a hmel pawh kha i en tha ngam lo a, i hawi kual leh hru hru tawh tak e" a rawn tih leh chuan sawi tur vak pawh ka hre lo, ka nui  vur vur ringawt a.

David te in kan thleng chu a ni chu a lo chhuak hman tawh a, BJa te in lam pan in a lo chhuak hman tawh a nih kan ring a, BJa te in lam pawh pan duh ta lo chuan kan call ta ringawt a, kan lo nghahna tur vel kan sawi zawh chuan nghak pah chuan Gabriel nen chuan Jen chungchang vel chu kan sawi dun ve leh mai mai a.

An ni pawh chu an rawn thleng har vak lo a, "Zan tin nitin kan nghah ngai pawh zanin chu kan va sawm a, mahse kha a lo chhuak hma hle mai maw" ti pah a rawn nui phei vur vur chuan an rawn phei a, "niang chu, nitin zantin hian 'Angeli rim tur 'ti tawh mai ila a tha ang" tichuan Gabriel chuan a lo tui hnih ve leh zeuh bawk a.

Lo ngaihtuah lawk mang hlei lo a ka lo tawng pawng chhuah hma lutuk te chu ka inchhir hnuhnawh leh hle a, rei tak chu min chhaih leh phah ngei dawn tih chu ka hre nghal mai a, muang em em ta lo chuan Remruati te in lam pawh chu kan pan phei ve leh nghal thuai a, thut dan tur, tawng dan leh nuih pah a hmui dah dan tih vel mai mai mi hrilh pah chuan an kal a, heng ho bul ah hi zawng thu tak tak tak pawh hi a awm thei lo ani ber mai, mahse heng te hi kan nuih pui leh kan hlimpui ber an ni lawi si.

"Remruat khaw nge i nu te hi?'

"An inkhawm a,,,, lo thu ru, Mami chu Room ah a awm a"

"Nih leh khaw nge i u Rina ve hi, a kal tawh ve tho ami?"

"Imm a kal deuh chiah in lo nang hman lo chiah chiah, Angeli chu ka han koh lawk ang e aw" tih leh mi rawn melh chu a rual deuh kher a, a zawh duh ang a zawt vel a a chhungte an awm lo vek tih a hriat chuan a hma ai a duhdah mah hian David chu an thu kual leh vel a, fiamthu a in khak leh fak fak chuan Bja nen chuan an nui dun leh hawk hawk tawh a.

"Eee in lo leng ani maw, in lo len duh tak tak pawh ka lo ring tawh lo a" rawn ti pah chuan thutna awl awm chhun ka bul ah chuan a rawn thu a, ka thiante over chhuah chuan thuthleng ah chuan an mu khat tlat a, ka tan a ti an ni tih chu hre mahila, an che naupang chhia hret thin tih chang chu ka ngah hle a, mahse naupang chhia tak a nun hian nun a ti hlim in a ti famkim em em thin thung ani.

"Nge maw kan peih loh ngawt ang le aw, chaw ei kham hma hma a mi rawn sawm khawm te pawh an awm zawk mawle" tih leh mi rawn melh chu BJa chuan an rual leh deuh kher a, "a ni em em ang, phur fal deuh an awm tlat in kei pawh ka hria" ti a Remruati rawn tui hnih ve leh phei chu a tul lo tak zet ani.

Angeli pawh chuan a hrethiam ve deuh nge ni mi rawn en zeuh pah chuan a nui deuh vur vur ringawt a, han chhan a han kah let dan vak ka hriat loh avang chuan za vak lem lo chuan kei pawh ka nui deuh vur vur ringawt a, "taka theihnghilh hma in Junior i thil lei duh chu zu lei vat rawh, khu lai lawk ah khuan dawr a awm alawm" ti a Gabriela rawn sawi chu ka bo hle a, engmah lei duh ka neih awm ka hre der bawk si lo a, "Dawr awm na i hre lo mi? Kha Mami khan a hria lawm, Mam zu kal pui lawk la"ti a Remruati rawn sawi ve leh chuan ka hrethiam chiang ta kher mai, duh ai chuan an zei mah mah deuh ani.

"Eee awle , hawh i duh te chuan ka lo kal pui ang che" Angeli chuan a rawn tih ve leh avang chuan kan in zui chhuak ve ta ringawt a, ka lei tur ber pawh hre lo chuan ka chhuak ve ta ringawt chu ani si a, chu mai bak ah ka thianten a hetiang thil an tih na chhan Angeli hnen a ka rilru sawi dan tur pawh chu ka hre chuang lo ani, a rual a ka thil hriat loh tih ve ve ngai bawk si ngaihtuah kawp chu kei a thluak chak lo chi tan chuan a har tak zet ani.

"Eng nge i lei dawn reng reng a?" ti a Angeli mi zawhna chu "ka la hre lo" ti chuan ka lo chhang pek a, nui vur vur pah chuan "i lei tur pawh i hre lo maw?" a rawn ti leh a.

 

"imm hre lo, ka lei duh hi lei an phal ang em tih ka hre bawk si lo a, a lei theih loh mai thei bawk a"

"Eng nge i lei duh a? Ruihtheihthil lampang a nih ka ring bawk si lo a"

"Ruihtheihthil chu ni bik lo e, mahse a ngawlh chu vei a awl lutuk"

"Eng maw? Sawi tha ve mai mai la aw"

"Nangmah" ka tih leh chuan mak tih hmel tak a mi en pah chuan a nui deuh suk ringawt a, "chuan i thinlung hi lei sak daih che ka duh bawk a" ka tih zawm leh nghal a, mahse "hei hi dawr chu anih hi" tih zawng chuan min chhang a, dawr lo hnai lutuk chu ka haw ru hle a, ka huaisenna zawng zawng sawngkhawm a ka sawi ve kha chhanna dawng ta rih lo chuan dawr ah chuan ka luh pui ve ta phawt a.

Lei tur nei lo a kal ve ringawt kha ka ni bawk a lei tur a vang ngei mai, Chocolate leh meizial te chu kan lei ve ringawt a, "Chocolate te hi maw lei i lo tum chu i van nuapang chhia reuh tak, zial te hi eng atan nge i lei ve  i zu lo an ti sia" ti pah chuan a nui vur vur a.

"Ka sawi vek tawh kha ka lei duh leh dawr a kan kal chhan chu dawr kan luh hma in i hriat vek kha" ka tih leh chuan a nui ringawt a, sawi tur chu a hre lo tak zet tih chu ka hre mai a, a hmui a pet leh fan fan thin ringawt te chu kei chuan tawng chhuak se ti tak chuan ka lo en reng ringawt zel a.

ANGEL

        A RUK TE IN

Rawlthar chhuak hlim tih tak ah chet dan naupang chhia leh nuihzatthlak tak tak a la tam bawk a hei vang hi aniang "Thatlai hun hlimawm leh ngaihawm" an lo tih fo chhan chu, In la Puitling tak mahse rilru la naupang chhia ru em em, in la pa leh mahni dik ber a in ngaih tlat lai, mahse Puitling kawng zawh tan ve mai chauh kan ni bawk si.

Remruati chuan in sum har a ti fal deuh bik aniang, a rawn nui chhuak ta nge nge a "Rinmawia te leh nangni thianho hi chu in va in mil lo ve tak e aw" a rawn tih chuan, "Mil chi an ni hleinem, dik tak chuan" a ngawi zui nghal vung vung a David chu, a sawi tum kan hrethiam tlang aniang zawt zui pawh kan awm lem lo, mahse Mami erawh chuan a hrethiam ve lo tih hriat tak chuan ngaihthlak chhunzawm chak ni awm deuh hian a lo kun hnai deuh hrut hrut a.

"A hrim hrim in eng tin nge Rinmawia te an lo len ve teh daih theih a?" tichuan BJa chuan a zawt a, "Kan kawmthlang lawk khu an in alawm, inkhawm kan kal rual a, kan haw rual leh bawk a, an rawn lut kawi lawk mai mai a" tichuan Remruati chuan a lo chhang ve leh nghal vat bawk a.

"Eng nge an ni thian dun nen chuan in mil loh na in neih hrim hrim a?" tichuan Mami chuan a zawt ta nge nge a, a hmel a a hriatthiam loh na leh a hriat chak na a thup bo zawh tak loh chu zawt hreh tih hriat tak hian a zawt tih chu kan hre tlang bawk aniang nui deuh sun sun pah chuan BJa chuan "aaa eng vak a ni lo, kan in hmu fuh lo vel mai mai mawle, mipa ah chuan tiang deuh hi a awm ve hrim hrim alawm" tichuan a chhang ringawt a, mahse kan awm dan vel a tang kha chuan in hmuh thiam loh satliah mai mai ani lo tih chu a hrethiam ve vek tho chuan ka ring.

"A hrim hrim in nang hi nizan nga ti nge i rawn  len ve loh hrim hrim a, nimin chhun ah 'ka rawn leng dawn nia' i ti  ve vek sia, i  tello in i thian te zawng i rawn tir leh daih a" ti a Remruati mi zawh na chu sawi zah tur leh thil sual ka tih vang ni bawk si lo chuan Jen te in a ka kal vang a kal hman ta lo ka nih thu a chhan chu ka hreh ru hle a, min zawt pawh chu tul ka ti vak lem lo khawp mai, "Nia chanchin engmah ka lo sawi leh hman ta lo a, Jen in buai na a tawk deuh a ka va kan lawk a, ka thiante bul ah ka sawi vek kha an sawi miah na nge a?" Tichuan ka thian te chu kan puh ringawt a, ka thiante ho lo ner leh tih loh hmel lutuk chu ka hmuh hmaih loh chiang kher mai.

"Aw ni maw, a van zia lo ve, Jen chu a tha viau amaw ka tia, eng buai na nge a lo tawh reng reng a?" 

"Aaaa eng vak ani lo, a tlu sual deuh a, mahse a tha lutuk ringawt"

"Nang hi tichung pawh sawn i lo la hel char char ani maw?" nui deuh huah huah chung chuan Remruati chuan a ti a, ka rin tawk vel ani, kan mi thawvengi hian a sawi tui chuan a sawi chhuah leh kha ka ring sa reng ani.

"A teuh lo emai a, thian bak kan ni hleinem, in chung ah thleng se , Jen chung a ka tih ang sawn in chung ah pawh ka ti ve tho ang" kan tih chu an awih viau hmel loh hlawm hle mai, mahse an awih emaw awih lo emaw kha bak a sawi belh vak ka tum tawh lo, chu ti anih loh chuan an sawi tui ang a, midang han zah em em tur an awm bawk si lo nen min chhaih leh vak chu ka hlau ani, an thawveng in lungkham dang an nei vak bawk si lo a, ka tan chuan sawi tam loh a, ngawihsan mai kha a tha zawk ani.

Mami sawi tur hre lo kan bul a lo thu ngawi ve kar chu in la zei fahran hian BJa chuan "Angeli chu i tawng lai leh i ti ti lai vel khan  i lawmawm riau a, mahse he tia i ngawih a kan ti ti ngaihnawm tih hmel deuh a i lo ngaihthlak hian i duhawm leh riau bawk a"  tichuan an chhaih zeuh a, hmeichhia, mipa ngam vak lo leh zakzum ve tawk tak ani tih hriat tak chuan sawi tur chu a hriat loh zual hmel hle a, a zak hmel te chu a duhawm ta riau mai bawk a.

"Taka ka thiante nizan an rawn leng haw hian 'Angeli' an ti vek mai che a, kei lah in 'Mami alawm' ka lo ti ve tlat sia, kan buai phah teh ania aw" nui pah chuan ka lo ti ve thuai bawk a, "ka hming pangai tak hi 'Angel Vanramengmawii'ania mahse ka chhungte'n 'Mami' min tia, mahse nang chu Remi min hmelhriat tir kha i nia ama min koh dan khan a sawi mai a, i thiante chu keima sawi kher kha an duh sia" nui sen sen pah chuan a ti a.

"Chu nang chu a chhungte koh dan ang in i koh nghal ringawt bik mai a" ti a Gabriel a mi rawn chhaih fiam na chu kan nuih pui ho leh dar dar a, "Thingpui kan lum ang e aw" tih leh Choka lam a phei chu Remruati chuan a rual deuh nghal mai a, Remruati ber choka lam a a phei tak si ah chuan Mami chu a hma ai chuan  a tawng tlem in a nui chuan mi a chhang tam ta zawk mah a, zei em em ni bawk si lo a BJa leh Davida'n in la zei tak mai a an han chhaih leh thin te chuan a nui sen sen a chhan ngaihna hi a hriat loh hmel thei hle a, mahse thu thiam tak te chuan han sawi tak tak se "a nui hmel chauh pawh a kawm tham in a kham awm loh e" an tih tur khawp a a nui hmel mawi te chu kei chuan ka lo en uluk thei hle a.

"Mami an ni ho kha chu eng ah mah ngai duh suh, an chin dan than ve ania, mi chhaih laih tih vel hi an hrat ve hrim hrim a nia, lai duh miah lo la an chhaih tha vak ngam lo mai ang che" ti pah a Remruati thingpui lo sem chu Mami chuan a lo nuih leh sen sen ringawt a, a sawi tur hre lo nui hmel mawlh mai chu ani, mi kan biak a min chhan si loh ah chuan thinrim theih miah loh tur a ka ngaih chu ni.

" 'Mami' ka ti dawn che nge 'Angel' ka ti ve zawk dawn che?" ti a ka zawhna chu , ka zawh a ai mah chuan midang chuan min lo chhang phur hlawm a "Chutiang mai mai a ho emai, i duh dan khan koh la ni mai lawm" an rawn tih chuan "chutiang ringawt ani ngai lo, koh duh dan bik riau hi kan nei thin alawm" ti chuan ka lo chhang let ve thuai a, "maw eng tia koh nge i duh zawk a?" Tichuan kan zawt zawm leh nghal zat a.

"An sawi ang khan i duh dan dan ani mai, duh dan bik pawh ka nei hrang lo"

"Kha kan sawi kha nizan ah kan inkawm vek tawh a, kan in hrechiang tawh alawm" nui vur vur pah chuan BJa chuan a rawn ti ve thuai bawk a, "Chu nizan rawn leng ve lo chu kan va pawimawh lo bik sawt ve a, hetiang a nih reng dawn ai chuan nizan a rawn leng ve ang deuh in 'Angel' ka ti ve zawk mai ang che aw" tichuan nui vur vur pah chuan kan ti a, "imm a i duh dan dan kha ni mai" tichuan min lo chhang ve thuai bawk a.

Thingpui te in zawh atang a rei vak lo ah chuan inkhawm an bang dawn hnai ni a kan hriat vang chuan haw te chu kan rawt ta a, "Tlai hi in leng hman dawn em? Hei Mami hi kan veng tlang ah khan a kal chak a, kan unau chauh a len ai chuan leng ho ila" ti a Remruati sawmna chu a tumah chuan sawi buai leh hnar tum kan awm lo tih a hriat hle a, lu lo bu nghut pah chuan kan "imm" rual deuh thup mai a, "hei kan va haw ang a, kan va in tifai ve thuak thuak ang a, leng tur chuan kan rawn sawm leh dawn che u nia" tichuan kan in thlah leh ta phawt a.

"Tum dang a ka tih loh dan deuh in tun tum chu ka hmeichhe hauh kan ti na teh ang, Angeli saw chu ka chanpual ania" kan ti chu an nui deuh huk a, "a va fair lo e aw, a tir atang in ka hauh tawh asin le, mahse nang ber in a chutia i hauh leh tlat si chuan kan in rawlh ve ngam tawh nang" tichuan BJa chuan min lo fiam ve nghal thuai a.

"Nang kha bialnu i neih reng kha lerh viau lo mai teh a, Ngaihzawng leh pack tih vel hi a lo ber ah a thla dam tal hi neih tur ania" ti a Davida lo fiamthu leh hlut chuan min ti hlim leh zual kher mai, in ti fai tur a mahni in lam pan darh a, a hman hmasa sa in sawm khawm leh nghal kan tih vang chuan mahni in lam pan chuan kan kal leh ta hlawm a.

A ngai te bawk in a nghah ngai ber chu ka ni leh a, an lo awm kim leh thap tawh mai, "A changtupa tur ber ah i in ngai nghal tak tak nge ni i van in uluk bik em em ve" ti a BJa min lo chhaih na chu ka nu chuan "eng changtupa maw?" Alo ti ve thuai bawk a, "Hawh u i kal thuai ang u, nghah ngai zawk kan ni ang e, a zahthlak dawn nia" ti chuan chhuah chu ka rawt ta nghal thuai a, an sawi thawi leh palh vaih anih chuan a thawi mai ni lo in a vai in ka nu chu an hrilh tlang leh nghal vek ka hlauh vang in chhuah pawh chu ka rawt hmanhmawh a, dik tak chuan ka pheikhawk bun tur pawh ka thlang fel pangai hman lo, Confi vak lo chuan ka chhuak ve ta tho a.

"Nang ni ho tawngthei lutuk hi chu aw, ka pheikhawk pawh ka duh zawng pawh ani hleinem, ka confi lo zo vek dawn anih hi" ti pah chuan ka vui deuh nawk nawk a, "Confi ringawt rawh, a duh dawn che chuan ti pawh hian a duh tho ang che" tichuan Bja chuan a lo sawi ve leh nghal thuai a, mahse ka confi phah lo chiang kher mai.

Remruati te pawh an in peih tawh tih hriat tak chuan an lo awm ran tawh a, chawlh pawh chawl khaw muang lo chuan kan len tum na lam pan chuan kan kal ta nghal a, "kan rei em? Hei vawiin chu nalh lo hlau deuh kan awm a, kan nghak rei lutuk alawm le" ti a BJa rawn sawi kual vel chu, ka lo nui duh lo kual vel a, mahse midang an lo nui thu tak si ah chuan keimah min sawi chhan tib a chiang ta sawt si a, ka lo in la mi tak ran pawh chu tul lo ka ti leh hnuhnawh hle a.

Tlang pawh chu kan thleng har lo a, a hmun a nuam in a thawveng bawk a Angeli pawh chuan nuam a tih ve hmel khawp mai, "Tah hian Remruat lo awm ila, Angeli kha chu a khaw thlir nuam zawk ah khian a kal duh chuan Junior khan han hruai mai se ani mai alawm, a hla tawh chuang hleinem khi khi lai lawk khi ni mai a" Gabriela'n a rawn tih chuan Angeli chu a nui suk a "a ho e, kal kher a ngai tawh hleinem, in kal peih tawh loh chuan tlai pawh hi a nuam tawh lutuk tho alawm" a rawn ti ve a, Ka thiante chuan chance min pek vel chu an tum nasa ve hle tih chu a hriat a, mahse kei a zei lo chi ka lo ni chu thu hran Angeli lah hi a zakzum ru ang reng bawk sia a buaithlak ru chu an tih hmel khawp a, Gabriela'n mi rawn melh rum leh thin te chu nuih a ti za ru ang reng hle zawk a.

"Aw hei lai kal ve ta rau rau te chu han thleng law law ila, khi mai khi a ni tho lawm, ti rawh Junior Angeli chu han hruai lawk ila, tah hian midang hi lo awm se ni mai alawm" ti pah a Gabriela kal nghal chu kei leh Angeli tan chuan zui loh pawh chu a nuam tawh bik lo a, a hnung ah  chuan muang chang chuan kan zui chho ve a, a hla lo bawk a, kan thleng chho thuai a, thli thaw deuh heuh heuh te chu a nuam hle a, khua vel pawh a lang nalh leh zual hle a, kan thlang hmuh phak lawk a kan thiante lo awm ve pawh chuan nuam an tih ve hmel viau tho mai.

"Angel nuam i ti em? Kan kal thleng chu i lawm viau lo maw? A hnai ropui si a, khu khu lai lawk khu nia an ni paeh an awm mai mai ni" ti pah chuan Gabriel chu a nui vur vur a, "eee kei hi zial ka pai reng reng hleinem, ka zu chhuk leh lawk mai ang e, ti khan in pahnih khan lo awm lawk mai rawh u" ti pah a a chhuk leh chu rawn chhoh mai a tum tawh lo tih chu ka hrechiang hle a.

"Hawh lo thu mai mai ila" ti pah chuan thut hmun ka rem nghal thuai a, ka bul ah chuan a rawn thu ve thuai bawk a, mahse min thut hnaih lutuk chu a hreh ve deuh tih hriat tak chuan a thu a, "Khua a lang ut bawk sia, i lung a ti leng viau lo maw? In khua lam te i ngai em ?" ti a ka zawh chuan "Nia lung chu a ti leng ve, mahse kan khua chu ka ngai vak chuang der lo" ti pah a a nui hmel te chu ka lo thlir reng a, eng tik lai khan nge ka hre lo mahse he nu hian min hneh tan riau tawh a, a hmel pawi sawi lo zet leh a mit meng zahawm run mai te, a nui hmel duhawm em em te chu ka lo en leh dauh dauh thin.

"Nga ti nge in khua chu i ngaih loh a? Kei chu zan khat pawh ka riah bo san thei lo, ka lung a leng a haw ka chak zek zek zel asin" nui vur vur pah chuan ka ti a, "in khua hi a nuam em a, nangni ho in lo fel bawk sia, mahni khua pawh kan hre chang tawh hleinem" ti a zak hmel pu si a, zak lo ni awm deuh a lan a tum te chuan a duhawmna chu a belh chhah tak meuh meuh ani.

"Taka nizan chuan tu buaina tawh vang maw i lo kal loh a, mi pawi tr kan lo sawi ang e ka duh miah lo ania" ti in nui vur vur chung chuan mi chu a chhaih ve a, mi a chhaih ve ngam chu mak ka ti hle a, mahse min ngam tlak a min chhaih nghal bawrh bawrh ni chuan ka ngai a, a ruk chuan ka lawm ru ve hle a.

"Aaaaa ka thiannu mawle, Jennifer ania, kan chung chang vel chu i la hre ve chiah lo ang a, mahse nakinah hun thawl deuh zawk ah kan la sawi dun dawn nia, taka i i unaunu in a hrilh vek tawh lo che em ni?" ti chuan ka lo chhang ve nghal thuai a, "Hrilh tawh e, kan in hmuh hmasak ber tlai khan min hrilh nghal vek tawh alawm" nui vur vur pah chuan a ti a, ka rin tawk vel kha a ni hrim hrim a, Remruati te zawng in a zep theih kha ka ring lo hrim hrim a, mahse demna tur leh ka thil tih sual a tel ve loh avang chuan zahthlak ah erawh ka ngai lem chuang lo a.

"Ka rin sa hrim hrim ania, a lo hrilh tawh che chu ka ring tho a, i i hriat tak tho tho ah chuan vawiin a i in leng dang te kha , kha Rinmawia kha nia a fa pai na pa chu" nui deuh vur vur pah chuan ka ti a, "Aw ka lo hre lo a, school vel ah in in tibuai thin anih ka ring ringawt a, mahse insual tih vel i ching ve hmel bawk si lo a, mak ka lo ti ru reng ani" a ti a, Lo vei in lo duh ru ve viau mahila Jen nen kan in kar vel a hria tih ka hriat tak vek ah chuan inthlahrun ruk na ka nei ta tlat a.

Ni pawh a tla dawn ruai ta bawk a haw lam chu kan hnaih tan a, kan thiante kan zu fin Thla chu min lo nuih deuh nghal vur vur hlawm ringawt a, kei chuan eng ah vak ka ngai lo na a, Angeli lai leh zak hmel vel erawh a lang chiang kher mai, mahse chu chu amah ti duhawm zual em em tu an ni bawk si.