ANGEL

           DUHNA

"Ka chanchin hriat loh tam tak i la neih ka ring a, chung chu hre phawt la chu ka duh a, mahse 'ka duh che' tih hi hre hmasa phawt la ka duh a" ka zam hmel leh ka zak chu thup hram hram ka duh a, mahse chung hmu tur pawh chuan a ni chuan en pawh min en ngam bawk si lo, a nui leh deuh sak thin a, mahse a nui hmel mawi em em chuan ka tan thu lawmawm nge lawmawm loh a ken ka hre bawk si lo.

"I chanchin vel chu Jennifer i sawi na anih chuan 'ka hre vek tawh' ka tih kha" a rawn ti chhuak ve hram a, mahse a thu rawn sawi chhuah ve awm chhun chuan ka din hmun a ti lai telh telh zawk bawk si, hnarna thu ni bawk si lo, pawmna thu a ni bawk si lo, hrethiam a har in sawi zawm tur mai pawh chu ka hre tawh lo hle a.

In chu kan thleng leh chu a ni deuh der mai a, kawng tawi lutuk mawlh mai chuan ka lung a ti awi thlawt lo ani, engmah sawi na hman a awm vak tawh bawk si lo a, ngawi reng chuan in ah chuan kan in zui lut ta ringawt a, ka thiante mi rawn mit sir vel chu kei chuan ka lu ka lo thin khum ringawt a, tih ngaihna vak chu an hriat loh hmel khawp mai.

"Dawr kha an lo sawn nge hmun dang ah in lei zawk ni ang aw" ti a Remruati mi lo fiamna chu "Angeli hian pen kawi na tur a hre reuh lutuk a" tichuan ka lo chhang ve leh nghal ringawt a, "naaaa van awihawm loh tak e aw, i thil lei tur i hre lo a, i ngaihtuah leh laklawh vel anih kha aw, mi puh reng reng suh" nui sen sen pah chuan a rawn ti a, "ka lei duh vel te chu kal lam ah pawh ka hriat vek kha,ka hrilh nghal vek che kha a" ka lo tih ve leh chuan a ngawi zui deuh hmak a, a lai hmel hlei hlei hi ni tha thin chu ni.

"Chu thubuai deuh a awm a va ang ve a, kal dun reng si thu a va rawn in ang ta lo ve, in rawn in tibuai chho em lo maw?" nui pah a Gabriela'n a rawn tih chuan, Angeli chuan mi rawn melh zeuh a, mahse ka lo en deuh kar vang chuan a hawi let leh rang kher mai.

Remruati chuan min lo hmu leh kar tawh a, mit mi lo san khum leh zeuh zeuh thin, a nghal lutuk hi chu a chang chuan a ngeiawm lek lek thin, "Mami thingpui i in leng te hi va lum la, ka in leng te pawh an ni ve si lo a" tichuan a nui leh har har a, a hnung a rawn ben deuh zeuh pah chuan "eng nge maw i in leng kan nih loh na bik aw, nula pahnih kan rawn rim kawp che u alawm le" tichuan David chuan a rawn ti ve leh a, nui pah chuan Angeli pawh thingpui lum tur chuan choka lam a pan phei ve nghal thuai a.

A nui reng mai te chuan a hmel hmuh a ti nuam in min ti hahdam deuh sawng sawng hian ka hria a, choka lam a a phei pawh chu ka en zui deuh vawng vawng a, "eee i ring kha i  herh ang e" ti a Remruati'n mi rawn fiam leh chuan ka hawi let rang kher mai, "ee saw lam saw ni maw in choka lo ni a?" ka tih chuan sawi tur pawh an hre lo an nui ringawt hlawm a, "aw nge maw an choka awm na ka hre lo ni ve mai a, nuih tur a awm em ni?" in la thu tak deuh hian kan ti leh a, mahse chung hlei hlei chuan an ni chu a tih nuih tam tir zawk amaw tih mai tur ani.

"Hriat sa hi chu in zawt lo ila a tha, 'Mami kha ka thlir zui alawm' ti law law la kan nuih pawh a za nep zawk ang" Remruati'n a tih leh chuan sawi tur a vang duh tawh ngei mai, ka sawi chhuah leh ka hrilh kher pawh ngai lo in ka awm dan vel a tang chuan ka rilru pawh an hrethiam ngei chuan ka ring, mahse a pawi ka ti em em chuang lo, 'hre sa in dawr ah pawh engmah lei tur nei lo ka thianten min tirh dawn pawh khan an in thlawp tha hlawm bawk alawm le, zahna chhan tur vak engmah a awm tawh hleinem' tichuan mahni ka in hnem a, mahse an ni lak a lo buai leh lo in hnem vak vak ai chuan Angeli rilru put hmang tur ka ngaihtuah chuan ka buai in in hnem chu ka mamawh zawk tak zet ani.

An sawi laklawh chuan an sawi reng ang a ka tan a nuam lo ang tih a hlau nge ni Gabriel chuan thil dang chu a lo sawi thuai a, min ti zangkhai hawk in ka hria , thil ho deuh deuh sawi in an nui an nui leh tawh a, mahse a kar lak a mi rawn kah leh zeuh an ching erawh chuan sawipui pawh min ti chak lo zo vek, Angeli thingpui lum te chu ka ngaihtuah a "thingpui lum te vil vak a ngai em maw ni aw? Lo phei se nakin ah a so hun ah a va phei leh mai dawn a" ti te chuan mahni chuan ka lo vui ve em em a.

Mahni ngaihtuah na kawm a ka lo awm melh melh lai chuan Angeli pawh thingpui sem in a lo phei ve der a, thil dang pawh en lo chuan amah chauh chu ka lo en leh deuh nghal ngar ngar mai a, ka beisei na mai mai nge chu ka hre lo, mahse a ni pawh chuan mi rawn mit sir ve leh deuh zeuh thin hian ka hria a, chu mai mai pawh chuan min ti nui leh vur vur ringawt thin .

"Eng nge i nuih vur vur bik a? Sawi law law la nui ho vek ang u" Remruati chuan a rawn ti leh a, mi lo en leh kar tawh a ni ngei ang chu, ka thiante pawh chuan lo tui hnih ve leh thuai in min sawi chhuah tir chu an tum ta tlat a, kei lah nui deuh var chauh chuan ka chhang a, ka chhan let ve chuan Angeli awm lai ngei ngei hian min fiam in min chhaih vak ang tih ka hlau ani.

An tum ang leh duh ang a ka chhan tak mai si loh avang chuan thil dang chu an sawi leh ta daih a, tlai lam a an sawi hmabak leh nuam an tih em em Angeli tihder pawh an tan leh der tawh a, mahse chu chu ka tan chuan a nuam tak zet ani, a nui hmel chu ka lo thlir reng zel a, a ti nui tu leh a nuih chhan ni lo mahila a nui hmel hmu thei ringawt a ka awm pawh chu a nuam tak zet ani, a nui hmel chu en rei pauh leh en a kham awm dawn lo amaw ni tih mai tur chuan en kham tik reng reng a awm thei lo a, ka en ngawih ngawih reng ringawt mai ani.

Remruati nu te inkhawm bang rawn haw chuan sana en na chang min ti hrechhuak ve chauh in kan haw san ve ta a, haw kawng a min chhaih leh thin te chu nin hmel tak chuan awm thin mahila dik tak chuan nuam ka ti ru em em a, min chhaih ringawt pawh chu ka hlimpui tawk em em zawk ani si a, Angeli rilru put hmang chu hriatchian ve thuai thuai chu ka chak tak zet ani, "a duh che lawm, a awm dan vel tang khan ka hrethiam vek" tichuan ka thiante chuan min hnem ve bawk mahse Angeli ka ngei atang a ka hriat a nih loh vang chuan ka awih thei tak tak chuang lo a.

Mut lai te chuan thil dang reng rilru ah a lang thei lo, ka mut a chhuak lo a ka ngaihtuah awm chhun chu Angeli chauh chu a ni tawh mai, muhil thei lo a darkar chanve vel zet ka khum a ka in leh kual ka in leh kual tak ah chuan call tawp chu ka duh a ,mahse ka inthlahrung ve deuh bawk si, mahse rilru put hmang engkim a hre tawh bawk a, bak ah hmai chhan ai chuan phone call atang a ni pawn a sawi ngam zawk ka rin vang chuan ka call ta tawp a.

"Hello" ti a a aw zangkhai vah mai a min lo chhang te chuan min ti hahdam sawng sawng in ka hria a.

"Aw.. Hello i lo la mu lo maw?"

"Immm mu lo deuh"

"A tlai tawh viau na a zanin a kan thil sawi kha kan sawi zo hman ta si lo a, sawi chhunzawm ka lo tum a, a pawi ang em?"

"Aaaa.. pawi chuang lo e, sawi la"

"Ka rilru put hmang engkim chu kha i hre vek tawh a, ka duh tak zet che tih pawh i hre tawh bawk a, i hriat atan a ka duh ka chanchin vel pawh i hre tawh tho bawk a, tunah chuan nangma min ngaihdan hriat ve ka duh a"

A ngawi vung vung a, min ngaihdan chu eng tiang pawh ni se sawi chu harsa a ti hle a ang, a thaw leh halh thin a, ka ngaih chu a tha zan tawh lo hle mai, "sawi inthlahrung lo la, engtiang pawh ni se sawi tawp rawh, engtiang pawn min ngai la chu chu kei chuan hriat ka duh a a ni mai" tichuan ka ti leh ta tawp a, eng pawh ni se rilru khingbai tak a awm reng ai chuan kan nih tur ang nih mai chu kei chuan ka duh zawk ani.

"Ihhh dik tak chuan kei pawn ka duh che lawm mahse" a tawp deuh chat a, nui chhuak ang tih hlau tak si rilru thawveng ru tak chuan "eng nge'mahse' sawi la" ka lo ti ve thuai  bawk a.

"Jennifer nen in chungchang vel ka hriat dan in, in in kar tha lo vel hi i tuar hle ni in an sawi a, chu mi i tuarna hliah khuh nan mai mai chauh min hmang ang a min thlauh thla leh si ang tih hi ka hlau a" a rawn ti a, chutiang zawng chuan a ngaihtuah ang tih reng ka lo ngaihtuah lo a, chhan thiam pawh a har ka ti hle a, mahse ka rilru dik tak chu engkim chu hrilh chu tha in ka hre ta a.

"Nia Jen nen kan chungchang ah kha chuan ka rilru chu a na ve tak zet alawm, Jen leh nang hi ka khaikhin ngai lo che u a, a chhan chu a ni chu ka hun liam tawh a mi ani a nang chu ka tun hun ami i ni, ka rilru na hliah khuh nan mai mai ka hmang dawn che nge dawn lo che tih  pawh ka hre lo a, a chhan chu i kiang ah natna ka neih ve ngai lo vang ani, ka thlauh thlak che i hlau maw? I sawi ang a ka natna hliah khuh a ka dam na lo ni ta tehreng pawh ni la, ka damna chu ka hlauh phal tawh dawn ami? Jen bul a ka awm zan pawh khan ka ngaihtuah che nge ngaihtuah lo che chu ka hre lo mahse, i kiang a ka awm kha chuan Jen hi ka ngaihtuah ngai lo hrim hrim"   a nui deuh suk a, "eng nge i nuih a?" ka ti leh thuai bawk a.

"I zei ve hrim hrim nge i rilru dik tak tih ka hre si lo a" a rawn ti leh hram a, a khirh zek dawn tih chu ka hrethiam mai.

"Ka rilru dik tak ka sawi, mahse min rin leh rin loh chu i thu thluk na tur ania, sawi theih ka nei ve tawh chuang lo a"

"Ka ring che lawm, i thiante ang in dawt sawi kual in min fiam kual ve ngai loh vang aniang ka ring lutuk che" nui deuh chung chuan a rawn ti a, chu tluk a ka tan a lawmawm chu a awm chuang lo ani "mahse ka rilru ka la siam fel thei lo ani" a rawn ti leh a, ka rilru chu a buai ru hle a, sawi tur vak ka hre tawh bawk si lo.

"Awle lo in ngaihtuah la chuan naktuk ah min hrilh leh mai ang a"

"Imm awle "

"Nih chuan Muttui aw, tha deuh in lo in ngaihtuah la"

"Awle tehreng mai, muttui le" 

Min duh ve tih ka hre tawh a, mahse chu chauh chu a tawk zo bawk si lo, a tuk a thil thleng tur Ngaihtuah ran chung chuan ka mu ve ta a.

Ni khi mal tak a a awm vang in a en na a hlauh phah loh a, a chhuah a thulh phah hek chuang lo , chu ni eng mawi tak chuan ka room a ka mu lai chu mi rawn chhun tho in ka phone chu ka check vat a, mahse ka beisei ang message te chu hnut chhiah a lo awm chuang lo a.

Ka tan va nawr vak a nuam tawh si lo, message leh call lah chu chhun thleng chuan ka dawng bawk si lo , thil dang ngaihtuah vak ka duh ni ah ber lah chuan ka thiante chu an reh ngawih ngawih mai bawk si, nidang a an rawn bengchhen theih tehreng nen, ninawm khawp khawp in an rawn bengchheng a, mahse tun hun ah zet zawng an reh ngawih ngawih mai ani.

Ka phone chu a rawn rik hlek chuan hmanhmawh tak chuan ka en nghal thuai thuai zel a, chu ti tak a thil nghahhlelh chu ka la nei ngai reng reng lo, mahse ka nghahhlel luat tuk vang nge ni ka beisei ang leh duh ang reng reng chuan engmah a thleng thei bawk si lo, ni te chu in her liam a tum tawh lo emaw tih mai tur chuan a kal muang ruih mai te chuan ka hria a, "zan lam thleng vat vat se" tih chu ka duhthusam a ni ber tawh mai.

ANGEL

      THIAN ATANG

"Rawn chhoh leh ka tum a mahse in lo nui dun ker ker bawk si a, rawn tel ve pawh kha a in thlahrun awm lutuk a, ka lo chho ve leh ta lo mai anih kha aw Angel" tichuan Gabriel chuan a lo chhoh tawh loh chhan chu chhuanlam a lo siam nghal thuai a, mahse rawn chhoh leh tum in a chhuk lo hrim hrim tih chu kei chang ni lo in Angeli pawh chuan a hai bik der si lo.

"Ka va awih kher kher lo tak, rawn chhoh i tum tawh lo hrim hrim tih chu ka hre ve vek aw" ti pah chuan a nui deuh sen sen a, "Kha tin en vung vung zel suh, i mawl hmel lutuk" ti a zawi deuh sap a BJa mi rawn hrilh chu runlui deuh chuan kan en lui deuh vak a, mahse ka ti fuh viau lem lo Remruati chuan mi lo hmu ve reng hi a, min lo nuih vur vur reng tawh a, ka in siam tha rang kher mai.

"Kha ka tih reng kha , thu hi awih ve mai zel tur hi nia" ti a BJa mi rawn hrilh nawn leh chu "nangmah vang vek" tih leh kut in thlak fiam chu kan rual leh ta nghal mai a, "Tlangval in Nula in len pui ve tih kha theihnghilh lo ula, zia thup aw" ti a Davida rawn au deuh chuan min ti tawp chiang kher mai.

Haw kawng ah te chuan Remruati chuan mi rawn nuih leh vur vur thin a, kei lah hre lo ni awm tak in ka kal hmiah hmiah lawi a, Angeli pawh ka thiante dawt sawi chu awih tur nge awih lo tur tih pawh hre lo in Remruati bul ah chuan "ami?" a rawn ti leh ngawt zel mai bawk a, ka thiante hian mi an thil la hriat loh awihawm loh deuh si, awih loh ngam ni chiah si lo a dawt hmang a mi fiam leh chhaih vel hi an hrat ve hrim hrim a, mahse hei tak hi an bul a awm ti nuam em em tu a ni ve leh bawk a.

Angeli pawh chuan a nel ve sawt tawh khawp a, fiamthu an duh bawk a, an nui reng a an bul a awm chu a hahdam thlak bawk em a nel chu an awm ve khawp ang, "Mami hi i duh em ni a? Ka lo sawipui dawn che ami?" ti a Remruati mi rawn zawt thut chu chhan thiam a har ru ang reng hle mai.

"Ka duh nge duh lo ka hre lo, mahse duh pawh ni ila sawipui chu ka duh kher lo" ti pah chuan ka nui deuh sak a, "i in la pa eng emaw kual vel ve reuh sia, hmeichhe thenkhat chuan tiang hi an duh lo zawk ania" .

"In lak pa lam ani lo, midang fak mawi chawp ngai hi chu a dik thei lo alawm, ama min hmuh dan tur zawk kha ania, chu bak ah hmeichhia vang in ka mizia thlak vak ka tum lo, ka nihna ang a min pawm theih loh chuan a tawk ani mai" 

"A ve ngei che chuan a, mahse Jennifer" a tawp hmak , sawi a inthlahrung ve deuh a ni ngei ang,  "Eng nge Jen chu?".

"Engmah a ni leh lo a ho emai a, ka sawi peih tawh lo e a" tih leh ka thiante ho va zawm in an zing ah a va bengchheng ve leh nghal a, a sawi tum te chu ka ngaihtuah a, Jen vang khan ka mizia kha ka thlak hlawk hlawk zel a, vawikhat mai ni lo in vawi tam tak a tan chuan ka thlak thin, hmeichhe dang bul ah mipa ngeiawm leh tawngthei tak ka nih lai in,Jen bul ah erawh mipa nelawm leh cool tak ka ni leh thung a, mahse a bul a chutia ka awm vang chuan midang bul a ka mizia kha a hre lo tih na a ni chuang lo, ka tan a mi special bik tak bul a danglam ka tumna leh ka zia dang te chu pawi tih na ka nei chuang hek lo, mahse Jen nen kan in kar a buai tak hnu khan thil tam tak ah ka rilru ka thlak a, midang bul ah tha tak in awm mahila ka chhungril tam tak chu a inthlak ve reng zel ani.

Angeli te unau kan thlah zawh chuan kan haw ve leh nghal a, haw kawng ah te chuan chanchin min zawt sap sap a, mahse Jen nen kan chanchin vel a hria a, ka zak a engmah ka sawi loh thu vel ka sawi chuan rin lawk ang ngei ngei in min deu leh em em a, "I ngam lo anih kha, Keiman ka ngam alawm le" ti a BJa rawn sawi chuan an lo thlawp pui leh hle tawh a, kei lah in "Nia pawi chuang lo" ka lo ti sam et mai bawk si.

An rin ai a ka bansan awlsam leh zawk vang nge ni, min fuih a tih dan tur min hrilh reng a, ka ngaihzawn loh chuan an tan a pawi ta emaw tih mai tur khawp in ngaihzawn tir min tum leh tlat tawh a, zan lam ah len leh nghal an sawi a,"kan lang mawlh mawlh lutuk lo maw? A zahthlak ania" ka tih chuan "hmeichhia leh uite" tih zawng chuan min lo chhang ve leh thuai bawk a, zan lam a len leh chungchang vel kan sawi zawh chuan kan haw darh ta hlawm a, len an sawi lai a peih loh hmel ber khan dik tak chuan len thuai thuai chu ka nghakhlel tawh ani.

Chaw ei kham chuan uluk tak a inchei in ka thiante mi rawn sawm pawh nghak zo tawh lo chuan rang tak chuan ka chhuak nghal a, Gabriel te in lam chu ka pan nghal a, "Khaw nge i len dawn a? Kha i va nalh reng reng ve a" ti a min lo be tu Jen chu chhan ngaihna vak chu ka hre lo hle a.

"Ka hre lo le, Gabriel te in ah hian ka kal phawt ang a, chu mi zawh ah kan la rel ang chu" ti in nui vur vur pah chuan ka chhang a, mahse a awih vak lo tih chu ka hre mai a, "a awihawm chiah loh, Remruati te in lam ah a ni lo maw? Tunlai chu in leng phei ngun an ti ania aw" ti chung chuan a nui vur vur a, midang min fiam na chu ni se ka nuih liam pui ve mai tur hi a ni a, mahse midang ni lo in ka nun a hmun pawimawh tak lo luah tawh tu Jen ngei mai kha a ni si a, nui ve vur vur mahila ka nuih chu a za mawlh lo ani.

"Tu nge lo sawi a?" tichuan zawt ve mahila Rinmawia chu a nih ka ring ve nghal ringawt a, mahse Rinmawia nen an in biak thin awm ka hre si lo, mahse an in bia emaw be lo emaw ka sawi theih a awm lo tih ka hre bawk si, Jen nen kan in kar ah engmah awm lo mahse Rinmawia leh Jen ka ngaihtuah kawp hi chuan ka thin hi a la rim em em zel tho ani.

"Tu emaw te te in" ti a nui leh vur vur chung a min chhanna chuan rinhlelhna min pek belh leh in ka nuih chu a za lo tak zet tawh ani, ka len phurna te chu a bo a, mahni a in a awm a mut leh mai mai chu a ni ka chak leh ber tawh ni.

"An ti ve mai mai anih chu, a nih leh ka kal phawt aw" tih leh Gabriel te in lam pan chuan ka kal ta nghal thuai a, Gabriela pawh a rawn chhuak ve leh chiah bawk a, an in ah pawh lut ta lo chuan Davida te in lam pan chuan kan kal ve leh ta nghal mai a.

"Jennifer khan Remruati te kha a thik a nih kha" a rawn ti chhuak thut chu kan thusawi zawng zawng a lo hre ve vek tih chu ka hre nghal mai a, "a awihawm loh emai a, thikna chhan tur a nei hleinem" ka tih chuan a nui ringawt a, "i va â tak e aw, Jennifer hi i hrechiang ber ang chu ka tia, mahse i lo hrechiang miah lo anih kha, a hmel awm dan leh a awka vel atang khan i hrethiam ve mai lo a maw ni aw" a rawn ti leh a.

"Kan thusawi kha i hre satliah mai ni lo in , min lo hmu vek ani maw?"

"Hmu e a, a biak tirh che a, i chhuanlam siam kan lenna tur i hriat loh thu i sawi vel pawh kha a awih lo lutuk tih a hmel ah khan a hriat vek alawm, taka nang chuan a hmel pawh kha i en tha ngam lo a, i hawi kual leh hru hru tawh tak e" a rawn tih leh chuan sawi tur vak pawh ka hre lo, ka nui  vur vur ringawt a.

David te in kan thleng chu a ni chu a lo chhuak hman tawh a, BJa te in lam pan in a lo chhuak hman tawh a nih kan ring a, BJa te in lam pawh pan duh ta lo chuan kan call ta ringawt a, kan lo nghahna tur vel kan sawi zawh chuan nghak pah chuan Gabriel nen chuan Jen chungchang vel chu kan sawi dun ve leh mai mai a.

An ni pawh chu an rawn thleng har vak lo a, "Zan tin nitin kan nghah ngai pawh zanin chu kan va sawm a, mahse kha a lo chhuak hma hle mai maw" ti pah a rawn nui phei vur vur chuan an rawn phei a, "niang chu, nitin zantin hian 'Angeli rim tur 'ti tawh mai ila a tha ang" tichuan Gabriel chuan a lo tui hnih ve leh zeuh bawk a.

Lo ngaihtuah lawk mang hlei lo a ka lo tawng pawng chhuah hma lutuk te chu ka inchhir hnuhnawh leh hle a, rei tak chu min chhaih leh phah ngei dawn tih chu ka hre nghal mai a, muang em em ta lo chuan Remruati te in lam pawh chu kan pan phei ve leh nghal thuai a, thut dan tur, tawng dan leh nuih pah a hmui dah dan tih vel mai mai mi hrilh pah chuan an kal a, heng ho bul ah hi zawng thu tak tak tak pawh hi a awm thei lo ani ber mai, mahse heng te hi kan nuih pui leh kan hlimpui ber an ni lawi si.

"Remruat khaw nge i nu te hi?'

"An inkhawm a,,,, lo thu ru, Mami chu Room ah a awm a"

"Nih leh khaw nge i u Rina ve hi, a kal tawh ve tho ami?"

"Imm a kal deuh chiah in lo nang hman lo chiah chiah, Angeli chu ka han koh lawk ang e aw" tih leh mi rawn melh chu a rual deuh kher a, a zawh duh ang a zawt vel a a chhungte an awm lo vek tih a hriat chuan a hma ai a duhdah mah hian David chu an thu kual leh vel a, fiamthu a in khak leh fak fak chuan Bja nen chuan an nui dun leh hawk hawk tawh a.

"Eee in lo leng ani maw, in lo len duh tak tak pawh ka lo ring tawh lo a" rawn ti pah chuan thutna awl awm chhun ka bul ah chuan a rawn thu a, ka thiante over chhuah chuan thuthleng ah chuan an mu khat tlat a, ka tan a ti an ni tih chu hre mahila, an che naupang chhia hret thin tih chang chu ka ngah hle a, mahse naupang chhia tak a nun hian nun a ti hlim in a ti famkim em em thin thung ani.

"Nge maw kan peih loh ngawt ang le aw, chaw ei kham hma hma a mi rawn sawm khawm te pawh an awm zawk mawle" tih leh mi rawn melh chu BJa chuan an rual leh deuh kher a, "a ni em em ang, phur fal deuh an awm tlat in kei pawh ka hria" ti a Remruati rawn tui hnih ve leh phei chu a tul lo tak zet ani.

Angeli pawh chuan a hrethiam ve deuh nge ni mi rawn en zeuh pah chuan a nui deuh vur vur ringawt a, han chhan a han kah let dan vak ka hriat loh avang chuan za vak lem lo chuan kei pawh ka nui deuh vur vur ringawt a, "taka theihnghilh hma in Junior i thil lei duh chu zu lei vat rawh, khu lai lawk ah khuan dawr a awm alawm" ti a Gabriela rawn sawi chu ka bo hle a, engmah lei duh ka neih awm ka hre der bawk si lo a, "Dawr awm na i hre lo mi? Kha Mami khan a hria lawm, Mam zu kal pui lawk la"ti a Remruati rawn sawi ve leh chuan ka hrethiam chiang ta kher mai, duh ai chuan an zei mah mah deuh ani.

"Eee awle , hawh i duh te chuan ka lo kal pui ang che" Angeli chuan a rawn tih ve leh avang chuan kan in zui chhuak ve ta ringawt a, ka lei tur ber pawh hre lo chuan ka chhuak ve ta ringawt chu ani si a, chu mai bak ah ka thianten a hetiang thil an tih na chhan Angeli hnen a ka rilru sawi dan tur pawh chu ka hre chuang lo ani, a rual a ka thil hriat loh tih ve ve ngai bawk si ngaihtuah kawp chu kei a thluak chak lo chi tan chuan a har tak zet ani.

"Eng nge i lei dawn reng reng a?" ti a Angeli mi zawhna chu "ka la hre lo" ti chuan ka lo chhang pek a, nui vur vur pah chuan "i lei tur pawh i hre lo maw?" a rawn ti leh a.

 

"imm hre lo, ka lei duh hi lei an phal ang em tih ka hre bawk si lo a, a lei theih loh mai thei bawk a"

"Eng nge i lei duh a? Ruihtheihthil lampang a nih ka ring bawk si lo a"

"Ruihtheihthil chu ni bik lo e, mahse a ngawlh chu vei a awl lutuk"

"Eng maw? Sawi tha ve mai mai la aw"

"Nangmah" ka tih leh chuan mak tih hmel tak a mi en pah chuan a nui deuh suk ringawt a, "chuan i thinlung hi lei sak daih che ka duh bawk a" ka tih zawm leh nghal a, mahse "hei hi dawr chu anih hi" tih zawng chuan min chhang a, dawr lo hnai lutuk chu ka haw ru hle a, ka huaisenna zawng zawng sawngkhawm a ka sawi ve kha chhanna dawng ta rih lo chuan dawr ah chuan ka luh pui ve ta phawt a.

Lei tur nei lo a kal ve ringawt kha ka ni bawk a lei tur a vang ngei mai, Chocolate leh meizial te chu kan lei ve ringawt a, "Chocolate te hi maw lei i lo tum chu i van nuapang chhia reuh tak, zial te hi eng atan nge i lei ve  i zu lo an ti sia" ti pah chuan a nui vur vur a.

"Ka sawi vek tawh kha ka lei duh leh dawr a kan kal chhan chu dawr kan luh hma in i hriat vek kha" ka tih leh chuan a nui ringawt a, sawi tur chu a hre lo tak zet tih chu ka hre mai a, a hmui a pet leh fan fan thin ringawt te chu kei chuan tawng chhuak se ti tak chuan ka lo en reng ringawt zel a.

ANGEL

        A RUK TE IN

Rawlthar chhuak hlim tih tak ah chet dan naupang chhia leh nuihzatthlak tak tak a la tam bawk a hei vang hi aniang "Thatlai hun hlimawm leh ngaihawm" an lo tih fo chhan chu, In la Puitling tak mahse rilru la naupang chhia ru em em, in la pa leh mahni dik ber a in ngaih tlat lai, mahse Puitling kawng zawh tan ve mai chauh kan ni bawk si.

Remruati chuan in sum har a ti fal deuh bik aniang, a rawn nui chhuak ta nge nge a "Rinmawia te leh nangni thianho hi chu in va in mil lo ve tak e aw" a rawn tih chuan, "Mil chi an ni hleinem, dik tak chuan" a ngawi zui nghal vung vung a David chu, a sawi tum kan hrethiam tlang aniang zawt zui pawh kan awm lem lo, mahse Mami erawh chuan a hrethiam ve lo tih hriat tak chuan ngaihthlak chhunzawm chak ni awm deuh hian a lo kun hnai deuh hrut hrut a.

"A hrim hrim in eng tin nge Rinmawia te an lo len ve teh daih theih a?" tichuan BJa chuan a zawt a, "Kan kawmthlang lawk khu an in alawm, inkhawm kan kal rual a, kan haw rual leh bawk a, an rawn lut kawi lawk mai mai a" tichuan Remruati chuan a lo chhang ve leh nghal vat bawk a.

"Eng nge an ni thian dun nen chuan in mil loh na in neih hrim hrim a?" tichuan Mami chuan a zawt ta nge nge a, a hmel a a hriatthiam loh na leh a hriat chak na a thup bo zawh tak loh chu zawt hreh tih hriat tak hian a zawt tih chu kan hre tlang bawk aniang nui deuh sun sun pah chuan BJa chuan "aaa eng vak a ni lo, kan in hmu fuh lo vel mai mai mawle, mipa ah chuan tiang deuh hi a awm ve hrim hrim alawm" tichuan a chhang ringawt a, mahse kan awm dan vel a tang kha chuan in hmuh thiam loh satliah mai mai ani lo tih chu a hrethiam ve vek tho chuan ka ring.

"A hrim hrim in nang hi nizan nga ti nge i rawn  len ve loh hrim hrim a, nimin chhun ah 'ka rawn leng dawn nia' i ti  ve vek sia, i  tello in i thian te zawng i rawn tir leh daih a" ti a Remruati mi zawh na chu sawi zah tur leh thil sual ka tih vang ni bawk si lo chuan Jen te in a ka kal vang a kal hman ta lo ka nih thu a chhan chu ka hreh ru hle a, min zawt pawh chu tul ka ti vak lem lo khawp mai, "Nia chanchin engmah ka lo sawi leh hman ta lo a, Jen in buai na a tawk deuh a ka va kan lawk a, ka thiante bul ah ka sawi vek kha an sawi miah na nge a?" Tichuan ka thian te chu kan puh ringawt a, ka thiante ho lo ner leh tih loh hmel lutuk chu ka hmuh hmaih loh chiang kher mai.

"Aw ni maw, a van zia lo ve, Jen chu a tha viau amaw ka tia, eng buai na nge a lo tawh reng reng a?" 

"Aaaa eng vak ani lo, a tlu sual deuh a, mahse a tha lutuk ringawt"

"Nang hi tichung pawh sawn i lo la hel char char ani maw?" nui deuh huah huah chung chuan Remruati chuan a ti a, ka rin tawk vel ani, kan mi thawvengi hian a sawi tui chuan a sawi chhuah leh kha ka ring sa reng ani.

"A teuh lo emai a, thian bak kan ni hleinem, in chung ah thleng se , Jen chung a ka tih ang sawn in chung ah pawh ka ti ve tho ang" kan tih chu an awih viau hmel loh hlawm hle mai, mahse an awih emaw awih lo emaw kha bak a sawi belh vak ka tum tawh lo, chu ti anih loh chuan an sawi tui ang a, midang han zah em em tur an awm bawk si lo nen min chhaih leh vak chu ka hlau ani, an thawveng in lungkham dang an nei vak bawk si lo a, ka tan chuan sawi tam loh a, ngawihsan mai kha a tha zawk ani.

Mami sawi tur hre lo kan bul a lo thu ngawi ve kar chu in la zei fahran hian BJa chuan "Angeli chu i tawng lai leh i ti ti lai vel khan  i lawmawm riau a, mahse he tia i ngawih a kan ti ti ngaihnawm tih hmel deuh a i lo ngaihthlak hian i duhawm leh riau bawk a"  tichuan an chhaih zeuh a, hmeichhia, mipa ngam vak lo leh zakzum ve tawk tak ani tih hriat tak chuan sawi tur chu a hriat loh zual hmel hle a, a zak hmel te chu a duhawm ta riau mai bawk a.

"Taka ka thiante nizan an rawn leng haw hian 'Angeli' an ti vek mai che a, kei lah in 'Mami alawm' ka lo ti ve tlat sia, kan buai phah teh ania aw" nui pah chuan ka lo ti ve thuai bawk a, "ka hming pangai tak hi 'Angel Vanramengmawii'ania mahse ka chhungte'n 'Mami' min tia, mahse nang chu Remi min hmelhriat tir kha i nia ama min koh dan khan a sawi mai a, i thiante chu keima sawi kher kha an duh sia" nui sen sen pah chuan a ti a.

"Chu nang chu a chhungte koh dan ang in i koh nghal ringawt bik mai a" ti a Gabriel a mi rawn chhaih fiam na chu kan nuih pui ho leh dar dar a, "Thingpui kan lum ang e aw" tih leh Choka lam a phei chu Remruati chuan a rual deuh nghal mai a, Remruati ber choka lam a a phei tak si ah chuan Mami chu a hma ai chuan  a tawng tlem in a nui chuan mi a chhang tam ta zawk mah a, zei em em ni bawk si lo a BJa leh Davida'n in la zei tak mai a an han chhaih leh thin te chuan a nui sen sen a chhan ngaihna hi a hriat loh hmel thei hle a, mahse thu thiam tak te chuan han sawi tak tak se "a nui hmel chauh pawh a kawm tham in a kham awm loh e" an tih tur khawp a a nui hmel mawi te chu kei chuan ka lo en uluk thei hle a.

"Mami an ni ho kha chu eng ah mah ngai duh suh, an chin dan than ve ania, mi chhaih laih tih vel hi an hrat ve hrim hrim a nia, lai duh miah lo la an chhaih tha vak ngam lo mai ang che" ti pah a Remruati thingpui lo sem chu Mami chuan a lo nuih leh sen sen ringawt a, a sawi tur hre lo nui hmel mawlh mai chu ani, mi kan biak a min chhan si loh ah chuan thinrim theih miah loh tur a ka ngaih chu ni.

" 'Mami' ka ti dawn che nge 'Angel' ka ti ve zawk dawn che?" ti a ka zawhna chu , ka zawh a ai mah chuan midang chuan min lo chhang phur hlawm a "Chutiang mai mai a ho emai, i duh dan khan koh la ni mai lawm" an rawn tih chuan "chutiang ringawt ani ngai lo, koh duh dan bik riau hi kan nei thin alawm" ti chuan ka lo chhang let ve thuai a, "maw eng tia koh nge i duh zawk a?" Tichuan kan zawt zawm leh nghal zat a.

"An sawi ang khan i duh dan dan ani mai, duh dan bik pawh ka nei hrang lo"

"Kha kan sawi kha nizan ah kan inkawm vek tawh a, kan in hrechiang tawh alawm" nui vur vur pah chuan BJa chuan a rawn ti ve thuai bawk a, "Chu nizan rawn leng ve lo chu kan va pawimawh lo bik sawt ve a, hetiang a nih reng dawn ai chuan nizan a rawn leng ve ang deuh in 'Angel' ka ti ve zawk mai ang che aw" tichuan nui vur vur pah chuan kan ti a, "imm a i duh dan dan kha ni mai" tichuan min lo chhang ve thuai bawk a.

Thingpui te in zawh atang a rei vak lo ah chuan inkhawm an bang dawn hnai ni a kan hriat vang chuan haw te chu kan rawt ta a, "Tlai hi in leng hman dawn em? Hei Mami hi kan veng tlang ah khan a kal chak a, kan unau chauh a len ai chuan leng ho ila" ti a Remruati sawmna chu a tumah chuan sawi buai leh hnar tum kan awm lo tih a hriat hle a, lu lo bu nghut pah chuan kan "imm" rual deuh thup mai a, "hei kan va haw ang a, kan va in tifai ve thuak thuak ang a, leng tur chuan kan rawn sawm leh dawn che u nia" tichuan kan in thlah leh ta phawt a.

"Tum dang a ka tih loh dan deuh in tun tum chu ka hmeichhe hauh kan ti na teh ang, Angeli saw chu ka chanpual ania" kan ti chu an nui deuh huk a, "a va fair lo e aw, a tir atang in ka hauh tawh asin le, mahse nang ber in a chutia i hauh leh tlat si chuan kan in rawlh ve ngam tawh nang" tichuan BJa chuan min lo fiam ve nghal thuai a.

"Nang kha bialnu i neih reng kha lerh viau lo mai teh a, Ngaihzawng leh pack tih vel hi a lo ber ah a thla dam tal hi neih tur ania" ti a Davida lo fiamthu leh hlut chuan min ti hlim leh zual kher mai, in ti fai tur a mahni in lam pan darh a, a hman hmasa sa in sawm khawm leh nghal kan tih vang chuan mahni in lam pan chuan kan kal leh ta hlawm a.

A ngai te bawk in a nghah ngai ber chu ka ni leh a, an lo awm kim leh thap tawh mai, "A changtupa tur ber ah i in ngai nghal tak tak nge ni i van in uluk bik em em ve" ti a BJa min lo chhaih na chu ka nu chuan "eng changtupa maw?" Alo ti ve thuai bawk a, "Hawh u i kal thuai ang u, nghah ngai zawk kan ni ang e, a zahthlak dawn nia" ti chuan chhuah chu ka rawt ta nghal thuai a, an sawi thawi leh palh vaih anih chuan a thawi mai ni lo in a vai in ka nu chu an hrilh tlang leh nghal vek ka hlauh vang in chhuah pawh chu ka rawt hmanhmawh a, dik tak chuan ka pheikhawk bun tur pawh ka thlang fel pangai hman lo, Confi vak lo chuan ka chhuak ve ta tho a.

"Nang ni ho tawngthei lutuk hi chu aw, ka pheikhawk pawh ka duh zawng pawh ani hleinem, ka confi lo zo vek dawn anih hi" ti pah chuan ka vui deuh nawk nawk a, "Confi ringawt rawh, a duh dawn che chuan ti pawh hian a duh tho ang che" tichuan Bja chuan a lo sawi ve leh nghal thuai a, mahse ka confi phah lo chiang kher mai.

Remruati te pawh an in peih tawh tih hriat tak chuan an lo awm ran tawh a, chawlh pawh chawl khaw muang lo chuan kan len tum na lam pan chuan kan kal ta nghal a, "kan rei em? Hei vawiin chu nalh lo hlau deuh kan awm a, kan nghak rei lutuk alawm le" ti a BJa rawn sawi kual vel chu, ka lo nui duh lo kual vel a, mahse midang an lo nui thu tak si ah chuan keimah min sawi chhan tib a chiang ta sawt si a, ka lo in la mi tak ran pawh chu tul lo ka ti leh hnuhnawh hle a.

Tlang pawh chu kan thleng har lo a, a hmun a nuam in a thawveng bawk a Angeli pawh chuan nuam a tih ve hmel khawp mai, "Tah hian Remruat lo awm ila, Angeli kha chu a khaw thlir nuam zawk ah khian a kal duh chuan Junior khan han hruai mai se ani mai alawm, a hla tawh chuang hleinem khi khi lai lawk khi ni mai a" Gabriela'n a rawn tih chuan Angeli chu a nui suk a "a ho e, kal kher a ngai tawh hleinem, in kal peih tawh loh chuan tlai pawh hi a nuam tawh lutuk tho alawm" a rawn ti ve a, Ka thiante chuan chance min pek vel chu an tum nasa ve hle tih chu a hriat a, mahse kei a zei lo chi ka lo ni chu thu hran Angeli lah hi a zakzum ru ang reng bawk sia a buaithlak ru chu an tih hmel khawp a, Gabriela'n mi rawn melh rum leh thin te chu nuih a ti za ru ang reng hle zawk a.

"Aw hei lai kal ve ta rau rau te chu han thleng law law ila, khi mai khi a ni tho lawm, ti rawh Junior Angeli chu han hruai lawk ila, tah hian midang hi lo awm se ni mai alawm" ti pah a Gabriela kal nghal chu kei leh Angeli tan chuan zui loh pawh chu a nuam tawh bik lo a, a hnung ah  chuan muang chang chuan kan zui chho ve a, a hla lo bawk a, kan thleng chho thuai a, thli thaw deuh heuh heuh te chu a nuam hle a, khua vel pawh a lang nalh leh zual hle a, kan thlang hmuh phak lawk a kan thiante lo awm ve pawh chuan nuam an tih ve hmel viau tho mai.

"Angel nuam i ti em? Kan kal thleng chu i lawm viau lo maw? A hnai ropui si a, khu khu lai lawk khu nia an ni paeh an awm mai mai ni" ti pah chuan Gabriel chu a nui vur vur a, "eee kei hi zial ka pai reng reng hleinem, ka zu chhuk leh lawk mai ang e, ti khan in pahnih khan lo awm lawk mai rawh u" ti pah a a chhuk leh chu rawn chhoh mai a tum tawh lo tih chu ka hrechiang hle a.

"Hawh lo thu mai mai ila" ti pah chuan thut hmun ka rem nghal thuai a, ka bul ah chuan a rawn thu ve thuai bawk a, mahse min thut hnaih lutuk chu a hreh ve deuh tih hriat tak chuan a thu a, "Khua a lang ut bawk sia, i lung a ti leng viau lo maw? In khua lam te i ngai em ?" ti a ka zawh chuan "Nia lung chu a ti leng ve, mahse kan khua chu ka ngai vak chuang der lo" ti pah a a nui hmel te chu ka lo thlir reng a, eng tik lai khan nge ka hre lo mahse he nu hian min hneh tan riau tawh a, a hmel pawi sawi lo zet leh a mit meng zahawm run mai te, a nui hmel duhawm em em te chu ka lo en leh dauh dauh thin.

"Nga ti nge in khua chu i ngaih loh a? Kei chu zan khat pawh ka riah bo san thei lo, ka lung a leng a haw ka chak zek zek zel asin" nui vur vur pah chuan ka ti a, "in khua hi a nuam em a, nangni ho in lo fel bawk sia, mahni khua pawh kan hre chang tawh hleinem" ti a zak hmel pu si a, zak lo ni awm deuh a lan a tum te chuan a duhawmna chu a belh chhah tak meuh meuh ani.

"Taka nizan chuan tu buaina tawh vang maw i lo kal loh a, mi pawi tr kan lo sawi ang e ka duh miah lo ania" ti in nui vur vur chung chuan mi chu a chhaih ve a, mi a chhaih ve ngam chu mak ka ti hle a, mahse min ngam tlak a min chhaih nghal bawrh bawrh ni chuan ka ngai a, a ruk chuan ka lawm ru ve hle a.

"Aaaaa ka thiannu mawle, Jennifer ania, kan chung chang vel chu i la hre ve chiah lo ang a, mahse nakinah hun thawl deuh zawk ah kan la sawi dun dawn nia, taka i i unaunu in a hrilh vek tawh lo che em ni?" ti chuan ka lo chhang ve nghal thuai a, "Hrilh tawh e, kan in hmuh hmasak ber tlai khan min hrilh nghal vek tawh alawm" nui vur vur pah chuan a ti a, ka rin tawk vel kha a ni hrim hrim a, Remruati te zawng in a zep theih kha ka ring lo hrim hrim a, mahse demna tur leh ka thil tih sual a tel ve loh avang chuan zahthlak ah erawh ka ngai lem chuang lo a.

"Ka rin sa hrim hrim ania, a lo hrilh tawh che chu ka ring tho a, i i hriat tak tho tho ah chuan vawiin a i in leng dang te kha , kha Rinmawia kha nia a fa pai na pa chu" nui deuh vur vur pah chuan ka ti a, "Aw ka lo hre lo a, school vel ah in in tibuai thin anih ka ring ringawt a, mahse insual tih vel i ching ve hmel bawk si lo a, mak ka lo ti ru reng ani" a ti a, Lo vei in lo duh ru ve viau mahila Jen nen kan in kar vel a hria tih ka hriat tak vek ah chuan inthlahrun ruk na ka nei ta tlat a.

Ni pawh a tla dawn ruai ta bawk a haw lam chu kan hnaih tan a, kan thiante kan zu fin Thla chu min lo nuih deuh nghal vur vur hlawm ringawt a, kei chuan eng ah vak ka ngai lo na a, Angeli lai leh zak hmel vel erawh a lang chiang kher mai, mahse chu chu amah ti duhawm zual em em tu an ni bawk si.

             ANGEL

Haw phei pah chuan Mami chungchang te chu ka ngaihven neuh neuh a, thil dang zawng ai chuan BJa bul a in sawi theih vel kha ka chak ber chu ani mai a, a bul a ka sawi hun chuan min chhan dan tur vel te ka ngaihtuah chuan ka ngaihtuah na mai mai pawh chu ka hlim pui hle a.

Chutiang a ka ngaihtuah na mai mai nuih pui vur vur pah a kawng ka kal lai chuan ka phone chu a rawn ri a, Gabriela a lo ni reng a, rang tak chuan ka pickup ve vat a, BJa nen an lo awm dun phei chuan ka hun hman dan vel chu hrilh ka chak tak zet ani, mahse rin loh leh beisei loh tak in Jen te in lam a kal ve vat a ngaih thu chu mi rawn hrilh a, kei pawh chu rang tak chuan Jen te in lam pan chuan ka kal ve ta nghal a.

Jen te in kawt ah chuan Gabriel chuan mi lo nghak reng a, "Tukin zing lam khan a tlu sual palh a, damdawiin lam ah te an kal a, mahse a tha ani awm e" a lo ti nghal thuai a, "Nih chuan eng nge naute?" Ka lo ti ve vat a, "aw a ni pawh a tha ani awm e, mahse Jennifer hian a lu vel leh eng eng emaw a sawh na deuh a, rawn hrilh tur che phei chuan min ti lo na a, nakinah i vui leh ka hlau a, ka rawn koh ve ta mai che ni, mahse ngaihtuah awm ani lo" a lo ti nghal thuai a, Gabriel leh Jen Cousin an lo ni hi chu a tha mange, engkim a chanchin a chhia a tha ka hriat ve phah zel thei thin a.

Jen a that tho vang chuan an in a luh ve kher chu ka duh ta lo a, an thenawm lawk a Gabriel te in a awm tho vang chuan Gabriel te in lam ah chuan kan phei ta zawk a, Thingpuite in pah chuan Jen chanchin vel chu kan sawi dun reng a, a khat tawk in min chhaih leh zeuh zel bawk a, Jen chu a chanchin vel zawh chian ve hrim hrim ka duh avang chuan ka va call ve ta tawp a,

"Aw .. Hello Jen, aaa i tlu sual palh tih te ka lo hria a, eng nge i an tawh a?"

"Gabriela'n a lo hrilh leh tawh che ni maw, 'hrilh kher a tul lo ania' ka ti mawlh mawlh sia a va luhlul ve a"

"Chutiang a pawimawh lo, 'eng nge i an tawh?' tih alawm ka zawh che"

"Min ngaihtuah suh, ka tha lutuk alawm"

"Awle that hlauh chu, lo kal ka tum deuh a mahse,,,, ka inthlahrung leh deuh bawk sia, hei Gabriel te in ah ka kal ta daih a"

"Naaa i van ho tak, lo kal mai mai rawh, a ho emai, zah tur a awm hleinem, ka nu te pawn i reh an ti teh ania aw"

"Haha.... Awle , ka hman chuan zan lam ah ka lo kan dawn che nia aw, nih chuan i that hmel tho bawk a, ka dah phawt ang e aw, zan lam ah lo kal ka tum dawn nia"

"Immm awle, lo kal ngei ngei rawh" a tih zawh chuan a off nghal a, "A aw leh a nui ri vel ringawt pawh ti khan i khik pui vur vur zel zawng ania, zan ah i len phei chuan i hmui hi a rawn thler haw vek mai ang a" ti chuan Gabriel chuan min lo chhaih zawm leh nghal zat a, Ni e, a aw leh a nui ri ka hriat vang ringawt a hlim leh nui ka ni lo a, a tha tih ka hriatna khan min ti lawm em bawk ani, a tlai lam ve ta deuh bawk a, kan in lam ah chuan ka phei ta nghal deuh mai a.

Tlai chaw ei na ah chuan Jen chanchin vel te chu ka chhungte chu ka hrilh ve a, zan lam a kan ka tum thu te nen chuan ka sawi a, "Nia a tha alawm, tiang ang te hian thian tha chu kan hlu zual bik thin ania, chaw vel te a ei tui loh phei chuan a ei duh zawng ang tur te kha ken sak ve la" tichuan ka pa chuan min lo hrilh ve a, ka bul ah sawi ngai lo mahse Jen kha tia a hmingchhiat tak hnu ah leh kan chanchin mi in an sawi sep sep tak thin avang khan ka nu leh pa hi chuan va hnaih vak tawh lo ila min duh pui tih hi chu ka hre ve tho a, mahse hetiang thil em hi chu min hriatthiam sak ve ani ngei ang .

Jen te in lam a leng phei tur chuan ka in siam mawlh mawlh a, ka thiante ho pawh an rawn ri leh ta bawrh bawrh hlawm a, Jen te in lam a min  len phei pui tur chuan ka sawm hlawm a, mahse chhuanlam fahrah te te siam in an pha zel hlawm a, mahni chuan ka leng phei ta tawp a.

Kawngka chu kan kik ri karh karh a, Nui sang hian Jen chuan min lo chhawn a, a hmel hahdam hmel tak leh rilru hahna nei miah lo ni awm tak a a hmel ka hmu te chuan min ti lawm a, Gabriela'n min fiam na ang khan hmui thler hian ka haw mai ang tih hlauhthawn awm khawp in a hmel zangkhai vah mai chu ka lo hlimpui ve leh em em ringawt mai ani.

"Khaw nge i nu te an awm a?"

"U Mawitea te man in hlanna ah khan an kal ve lawk a"

"Nga ti nge i kal ve loh a?"

"Aw i lo leng dawn bawk sia , ka kal daih te chuan kan in i lo nghah a ngai dawn asin" ti pah chuan a nui vur vur a, dik tak chuan han kal ve se chuan ka ngei ru leh viau awm tho si a.

Ka Ngaihtuah chiang a , a damlo kan ka ni tih ka in hrechhuak leh thut, a van hahthlak thin tak, he nu bul ah hi chuan ka buai deuh hlek thin chu a nih chian hi , "Ka rawn len dawn vang anih loh kha a, i i dam tak alawm le" ka tih chuan , a nui deuh vak a , "mi rawn kan tih ti khan i hrechhuak chiah ani maw?" A tih chuan kan nui dun a, kan hlim dun hle mai, inngaizawng hlim tak ni lo mahila thian hlim tak kan ni leh thei chu ka lawm tak zet ani.

Amah a tha tho bawk a, rei vak len na chi ah ka ngai lo a, haw lam chu hnaih tha in ka hria a, "Ka haw phei phawt mai ang aw, a tlai dawn tan emai" ka tih chuan, "A la hma em hi, ka nu te pawh an rawn haw tep tawh ang ka ring min lo nghah pui law law la" a ti a, dik tak chuan a nu te hmuh hi ka la hreh deuh vang in an rawn haw hma a haw chu ka duh zawk a, haw chu ka tum deuh tlat vang chuan min chelh lui ngam ta bik lo a.

In ka thlen phei chuan ka thiante ho chu an lo la awm ka ring a mahse an lo awm tawh lo a, zan dang ah khawi dang ah vak kan kal ngai lem lo a, bak ah tun ang hun hi an haw hun a la ni lo hrim hrim avang chuan chanchin ka hriat duh vang chuan Gabriel chu ka call ta nghal a.

Remruati te in a an len thu vel te chu min hrilh chuan ka hrechhuak ve ta chiah a, mahni inthiam lo deuh chung chuan khum ah chuan ka mu ta vel mai mai a, "A ho emai a, Remruati te mai mai alawm, a ai a pawimawh ti in ka kal alawm, len loh vang mai mai a in thiam loh na chhan tur ka nei lo" ti te chuan mahni chu ka han in hnem ve a, mahse Remruati ni lo in Mami chung ah ani ka inthiam loh zawk ni, Thian ang tak tak in nel tak in kan in kawm ve tan chiah a, chu tah chanchin hrilh awm miah lo in ka thu lo sawi ve tawh ka sut leh nghal ringawt ania, eng tin nge min ngaih ang tih te chu ka ngaihtuah a, mahni in hnem lui ve viau mahila nuam chu ka ti thei thlawt lo ani.

Pathianni tuk ani a, Dar 8 a lo ti tep tawh a, thawh ve leh ka inbual nghal a, inbual zawh chuan chhung inkhawm tur in min lo nghak thap tawh a, ka ril a tam tan tawh nen ka nu thusawi leh a tawngtai pawh chu a nghah ngai ber chuan ka ning leh ber emaw tih mai tur in ka ning leh hle tawh a, Chhung inkhawm neih zawh chuan Chaw te kan ei a, chaw ei na ah chuan Jen that leh eng nge a an tih te chu min zawt hlawm a, a that thu leh a ngaihtuah awm loh thu te chuan ka chhang a, an fapa thian tha em em kha leh chen a lo buaipui tawh chu an ngaihtuah ve hle tih chu a hriat mai a.

Inkhawm ban chuan tih dan ngai te bawk chuan kan thianho chu ka room ah chuan an awm khawm leh thup tawh a, zan hmasa lam a an lenna vel te leh ka kal ve lo chu min ui pui thu vel te chu in la changtupa deuh tak hian BJa chuan a sawi vel a, a buaithlak thin teh e aw, tunah chuan a bialnu pawh a thinrim leh tawh ngawt ang le, Mami chanchin hi hre phei se chuan eng tin tak ti leh ang maw, mahse tawngkam thiam tak ani bawk a thiam lohna nei lo ni awm deuh in a in sawi fihlim leh theih tho chu a rinawm a.

"Nizan chu Angeli pawn 'nga ti nge a lo kal ve loh a?' a tih che kha, chhun lam ah kan tel lo ten i lo va leng vel a i va phakar ve a" BJa'n a rawn tih leh chuan, kei chu ka lo bangbo kher mai "Tu nge Angeli chu chutiang ka hre lo e a" ka lo tih chuan , ka thiante chu an nui deuh huk a, "Zep tur a awm tawh lo e, nizan ah a sawi vek alawm le aw" David chuan a rawn ti ve leh a, mahse kei chuan ka hre lo tlat bawk sia ni.

"Ka hre lo tak tak alawm,a hrim hrim in nizan chuan Remruati te in ah ni lawm ni in len?"

"Aw ni reng e, a unaunu kha Angeli chu, nimin ah i va leng ve a, a hming pawh hre lo in i lo haw leh vel ani maw, tawng pawh i va tawng ngam lo leh vel ami?" David an a tih leh chuan, kei chuan ka hrethiam ve ta chauh a, sawifiah kher pawh tum chuang lo chuan "aw ani maw" ka ti liam vel ta mai mai a.

"A hrim hrim in kan hriat loh te a i lo va len vel a, i duh deuh em ni? I duh chuan kei chuan ka nei sa tho a, ka kian kian mai ang  che" ti pah chuan BJa chuan min nuih vur vur a, nimin lam a in sawi theih khum kan tum nasat ve nen ka tum ang chiah ka chung ah a thleng ta zawk ani.

"Aw.... a tha dawn nge dawn lo ka lo va en chhin vel alawm le aw" tih ringawt chuan nui vur vur pah chuan ka chhang a, mahse an awih hmel viau lo khawp mai, a hrim hrim in ani pawh ka bul ah Mami a in tia ka thiante bul ah lah Angeli a lo in ti leh daih a, min tih zah phah tep leh nghal a ka ngei ru ang reng viau mai.

"Hei chawhnu inkhawm a tum lo anih hi, kan va leng dawn ami?" BJa chuan a rawn ti a, eng tin mah chuan chhang lo hlawm mahse an hreh vak lo tih chu a hriat theih hlawm a, BJa phur tawh te phei chuan tuna kal mai te a rawt ti tih tan der a, mahse "inkhawm kal phawt rawh se" kan tih deuh tlat vang chuan a rawt duh ta bik lo a.

Chawhnu inkhawm dar an nawn ve leh chuan phur deuh mai hian an kal hlawm a, kal chu ka phur ve lo tlat a, kal loh ka tum lah in "a fair lo" an ti tlat bawk si a, phur vak lem lo chuan ka zui phei ve hnak hnak a, "zan a len pawh tih nak lai in , chhun chhun a len te chu a zahthlak loh maw?, Duh leh tlai ah leng tur in sawm mai ula" ka tih chuan "engmah sawi thei i ni lo, zak ang deuh khan lang lo mai teh, nimin chhun ah pawh i len tawh tho kha, nangma min zirtir anih hi" an tih chuan ka ngawi chiang kher mai.

An in kan thlen chuan in ti tlangnel fahran hian BJa chu an awm vel a, mahse Mami ber pawh chu a lo awm lo a, "Khaw nge Angeli hi a awm a?" BJa chuan a ti nghal thuai a, "khu tah dawr ah an kal lawk a, an lo chho tep tawh ang" Remruati chuan alo ti ve nghal bawk a, "Nga ti nge nizan ah i lo kal ve loh a, Mami pawn i lo kal a ring ve em em a" a tih zawm leh nghal bawk a.

"Nia lo kal kha chu ka tum a, mahse Jen in buaina a tawk deuh a, ka rawn kal leh hman ta lo ani" ka tih chuan mak tih hmel deuh hian min en a, mahse engmah chu a min zawt zawm tawh bik lo a.

Rei vak lo ah chuan Mami te pawh chu an rawn thleng a, A rawn lut mi rawn hmu chu mak a tih hmel hle mai, mahse a hnung a rawn zui lut tu te chu kei chuan mak ka ti zawk a, tu dang ni lo in heng zawng zawng ka chung a thlen tir tu Rinmawia te thian dun chuan Mami chu an rawn zui lut a, mahse kan thianho kan lo awm ve thap chu an ni pawh chuan nuam an tih vak hmel loh khawp mai.

Remruati chuan hre chhuak phut ni awm tak hian "Aw... Ni dawn tak, hawh junior in suk chu mi han en pui lawk rawh" a rawn ti phut chu, ka hrethiam lo kher mai, mahse in chung lam ah a chhoh zui nghal mai avang chuan kei pawh chuan ka zui ve nghal mai a.

"Rinmawia nen a in in kar vel kha ka lo theihnghilh daih a, chu lo ah in rawn lang thut bawk sia, engmah lo sawi na chang ka hre lo a" a rawn ti a, "Rinmawia nen hmun khat ah kan leng a kan in hmu ve palh ani mai a, ni e kan in kar chu a tha vak lo alawm mahse eng nge chu tah chuan thiam loh na i neih" ti pah chuan ka nui vur vur a, "hawh teh chhuk teh ang, chutiang vang mai mai a mi koh chhuah a ho emai a" ka tih leh chuan , nui deuh sang pah hian a chhuk ve mai bawk a, Remruati hi chu a thawveng bawk a, chhet khut khut leh mak deuh deuh a chet a hrat bawk a ho te ah hian amah hi a lo in thiam lo ve vat zel ringawt hrim hrim a, mahse hei tak hi amah ti duhawm reuh em em tu a ni ve tlat thung si.

In chhung kan lut leh te chu a hma zawng ai a zang khai leh hlim hmel hian ka lut a, dik tak chuan kei ai mah chuan ka thiante ho hi ka ngaihtuah zawk ani, Rinmawia thil sawi te chu an lo hnial a, an lo khak leh fak fak thin a, ka nuih a za ru hle na in kut an thawh ang tih mawlh chu ka hlau a, Mami lah chuan ka thiante chu hriatthiam loh hmel zet hian a en leh ha ringawt zel a, ni e a hrethiam lo ngawt tak ang, a zan hmasa a a hmelhriat tirh kha chuan khawvel a mi hlim ber leh fiamthu duh ber ni awm tak in an nui reng ang a fiamthu an thawh reng bawk awm si a, mahse tun a a hmuh dan tur ah hi chuan Bomb puak mai tur te pawh an ang bawk em ani.

Rinmawia te thian dun pawh chuan nuam an tih vak loh avang chuan an haw har lo hle a , an chhuah dawn chuan an hriat phak awm tawk vel hian "ka la vel khawp ang mawle" Gabriela'n an ti chu nuih in sum a har tawh khawp mai, len dawn tirh a an han phur in an han hlim hlawm tehreng nen tun ah chuan biak pawh an huphurhawm tung tawh hlawm mai.

ANGEL

             HLIMNA

Inrinni tuk ani a, inrinni tuk dang a ka tih dan ngai te bawk in ka nu bazar chu ka zui kual ve leh hnak hnak a, in khai bawr luk chung chuan ka riltam tawh thu ka sawi ve chhen bawk a.

"Kha i bazar ve law?"  rawn ti chu ka en thuai a, Remruati leh nimin lam a a sawi Mami a tih kha ni ngei tur ani, kan hma lawk ah chuan an lo ding reng a, "imm anih hi , kha i bul ami kha nimin a mi kha ami? Mi in hmelhriat tir dawn lo ami?" Kan ti ve thuai bawk a, BJa sawi el nan chuan ka duh ve hrim hrim a, mahse nimin lam khan ka lo en chiang lo a, a hmel kha ka lo hre lo bawk nen , tia chiang tak a han hmuh chuan a chhe lem lo khawp mai.

Remruati pawh chuan mi in hmelhriat tir ve mai bawk a, mahse a zahzum hmel hle mai, BJa mizia nen kan ngaihtuah kawp a, an in mil dawn loh zia te chu ka lo ngaihtuah kual vel a.

"Bawihte i duh chuan lo han haw tawh mai la" ka nu chuan a rawn ti a, Remruati te pawh chuan an duh ang an lei zo tawh aniang haw chu an lo tum ve mek bawk a, ka riltam tawh bawk nen a chhak deuh a Thingpui dawr a thingpui in kawi pui ah chuan ka sawm ve ta ringawt a, an lo rem ti ve mai bawk a.

Kan thu fel deuh chiah tih ah chuan "naaa lawk aw anu thil min chah ber ka theihnghilh daih alawm, Mam ti hian lo in kawm ula , keimah in ka zu kal leh lawk mai ang aw, Junior lo awm pui lawk mai aw" ti pah chuan Remruati chu a liam thla leh deuh nghal mai a.

Thingpui te chu kan lam a, in pah chuan "i rawn awm na a rei tawh em?" Kan ti ve a, "aih rei lo" tih chauh chuan min chhang a, ka hmelhriat sa chu ni se ka hau leh nek ngei ang, sawi tur hriat bik loh nak lai a, biak ve chhun a tawi te leh a rul tawk chiah a in chhan hi chu ching ve viau thin mahila ka ngei tlat zel pek a.

"Nih chuan eng tik nge i rawn awm a? Remruati te nen hian eng tin nge in in chhun reng reng a?" 

"Nimin piah tlai khan ka rawn thleng chiah a, Remruati hi ka cousin ania, a nu hi ka nu nau chiah ania"

"A hrim hrim in khawi khua nge i nih a?"

"Lunglei"

"Teh daih chuan Lunglei atang he lam ah teh daih lehkhazir tur a rawn awm chu "

"Nia chhungkua ah buai na tlem a awm a" a tih leh chuan ka ngawi deuh hmak mai, ka zawt kher kher chu ka inchhir ru hle mai, "I rawn thlen na a la rei si lo a, thian leh hmelhriat pawh i la nei vak awm si lo a, keini ang te hi min kawm ve duh dawn te chuan ka kawm thei reng che nia" nui deuh vur vur chung hian kan ti ve leh a.

"Kawm duh loh na chhan tur a awm hleinem, Remruati chauh hi ni mai a ka hriat chu"

"Aw Remruati nu leh pa te pawh i hre lo em ni?" ti chuan ka lo fiam ve leh zeuh a, "'Inhnial a hrat lutuk ' a ti che a, a sawi dik anih hi" ti pah chuan ani pawh chu a nui deuh suk a.

"Ka chanchin te a lo sawi ani maw? Eng tin nge a sawi a?" 

"Aaaaa eng tin vak mah, 'a fel lutuk' tih vel ani mai" a ti bah deuh nuai mai, a chhan em em pawh ka hre lo, mahse ka chanchin an lo sawi ve tih ka hriat chuan ka hlim ru hle a, mahse eng tin tak nge a lo sawi ang tih ka hriat loh na chuan min ti mangang ru hle bawk a, mahse eng tin pawn lo sawi se ka chanchin dik tak a sawi a, thu belh leh dawt a awm lem loh chuan pawi tih na vak ka nei lem chuang lo.

A phone number te chu ka dil ve ta ringawt a, mahse phone ken na chang ka lo hriat loh avang chuan ka phone number te chu kan pe leh ta zawk a, "in in thlen hun ah mi lo call mai rawh aw" ka ti kual vel ta ringawt a, Remruati pawh a lo thleng chho ve leh tawh a, kan thingpui in na man vel chu pek tum in ka han in dap a, mahse ka nu bazar zui mai mai kha ka nia, pawisa ah chhuah na chang reng reng ka lo hre ve der bawk si lo, a mipa ber in a han pek loh lah ka zak ve bawk si, "Pawisa ka lo ak chhuak miah lo a, tukin chu Remruat lo pe mai rawh aw, nidang ah kan in ho leh chuan ka pe ve tawh thung mai ang, ka haw san che u nia" tih leh rang tak a kal chu ka rual nghal mai a, hawi pawh ka hawi let tawh lo, ka zak lutuk kha khu thei ila chuan ka khu ral chiang viau ang.

Thlan hluam chuan in ka thleng ve thei hram a, "Khaw nge i kal kawi reng a? Ka ril a tam i ti reng sia ka lo haw hma a, nang lah i lo la haw reng reng bawk si lo a" ka nu chuan a lo ti a, "Chutiang ani lo, zah mah nak a lai a, min lo be hrih suh u" ka tia , Tui ka in zawh chuan thuthleng a mu chung chuan ka ngaihtuah let a, ngaihtuah chhuah ngun pauh leh zah a zual zel mai bawk si a.

Remruati chauh kha chu ni se a zia a, mahse Mami kha a tel ve khanglang bawk si a, mahse ka ngaihtuah chiang a Mami tel ve avang a ka zahna chhan tur kha ka hre lem lo a, tum dang ah pawh ka hmelhriat te ber an tel chuan eng ah vak ka ngai ngai lem lo kha ani a, mahse tun tum chu a dan a dang deuh tlat mai a, chutia thil ka lo ngaihtuah kual vel lai chuan ka nu te chuan chaw ei an lo peih der tawh a, Chaw kan ei a , chaw ei na lam ah chuan tukin vel a ka thil tawn te chu min zawt a, kan hlim pui ta phian zawk a.

Chaw kan ei kham chuan ka chhungte chu eng eng emaw tul sawi chuan an chhuak leh ta hlawm a, U Seni nen chauh chuan in ah kan awm a, ka tih dan ngai te bawk in ka room lam ah ka mu leh a, mu pah a kan thianho group a ka pawt mawlh mawlh lai chuan ka phone chu a rawn ri a, mi rawn call tu ka hmu chu ka phu chiang kher mai, tu nge a nih pawh ka hriat loh mahse a message ka lo beisei ve em em ringawt mai, min lo call sual tu nu ngei kha ani, aw te chu kan thian hmasa leh te te a, phone chu ka pickup ta a.

"Aw... Hello"

"Aw Junior keimah Mami aw , min lo call mai rawh kha i ti si a" a rawn tih chuan , mak ti bawk si hlim ru deuh mai chuan ka awm a, chhan mai na chang ka lo hriat loh avang chuan "Hei Remruati'n i hman chuan lo leng phei la a ti a" a rawn tih leh chuan ka harh chhuak hlawl a, "Nia aw awle ka lo leng dawn nia" ka tih chuan phone chu a off zui ve mai bawk a.

Min lo call sual tu ka lo hlimpui ve em em kha amah kha a lo ni reng a, thil thlen dan te chu mak ka ti a, nuih lam lam te a ti za zawk a, Mami pawh chu a hma ai in belhchian ka chak zual phah ta a, a tir ah kha chuan BJa vang chauh khan amah kha kawm ka chak a, mahse tunah chuan amah Mami hrim hrim hi ka hrechiang chak  tak zet tawh zawk ani.

Ka thiante chu phone a kal pui ka tum deuh a, mahse ka ngaihtuah chiang a min tibuai kual leh vel mai mai dawn a ka ngaih vang chuan mahni kal chu ka tum ta zawk a, zing lam bazar na ah ka thlan deuh hluam bawk nen inbual hmasa a, Remruati te in lam a leng phei tur chuan ka in siam mawlh mawlh a, mahse ka ngaihtuah chiang a, chun chun a va len chu ka inthlahrung ru ang reng khawp a, mahse "Zan ah kan leng lo a, chhun ah tal kan len ve loh chuan" tichuan ka inhnem kual ta vel a.

Remruati te in pawh chu rei vak lo ah chuan ka thleng phei ve leh mai bawk a, Remruati leh Mami chauh chu an lo awm a, Mami chuan TV a lo en a, Remruati chuan in suk a lo zar mek bawk a, "Ti khan lo thu rawh, kha Mami nen khan lo in kawm leh lawk mai rawh u, ka laklawh emai" tichuan Remruati chuan mi lo au ve lang lang a.

Sawi tur chu kan hre dun vak lem lo bawk a, TV pawh chu hmuhnawm tih vang em em ni chuang lo chuan kan en uluk dun hle mai, "Nga ti nge in kawm ve bawrh bawrh ta che u, Chengkawl zaipawl an sawi ang mai kha tia in awm tlat a" tichuan Remruati chuan a rawn ti leh a.

"Sawi tur a la vang alawm , tian kan ngaihtuah khawl ang a nakin ah kan sawi teuh dawn lawm, ti raw Mami" kan tih chuan a lu a lo bu deuh nghut ringawt a, a hnu deuh ah chuan Mami chu a rawn nui deuh vur vur ringawt thin a, kan TV en ah lah nuihzatthlak a awm bawk si lo a, ka ngaih chu a tha chiah lo khawp mai, ka in thuam dan ah dik lo lai a awm em tih te chu ka ngaihtuah kual ta vak ringawt a, mahse engmah dik lo a awm bawk si lo, a hnu ah chuan ka ngaihtuah chhuak a, thil dang vak a nuih lo ang tukin a ka chet dan kha a nuih a nih ngei chu ka ring ta bur a, ka zak leh hnuhnawh khawp mai, min lo call sual tu kha a ni tih ka hriat hnu khan eng dang lo ngaihtuah tawh lo in amah chauh kha ka lo ngaihtuah khanglang a, chu ti ni lo se chuan ka len dawn loh tehreng nen aw.

Leng lut ve deuh chauh e ti lo chuan haw dan tur chu ka ngaihtuah ru ta sek ringawt a, mahse chutiang vang mai mai a leng han haw leh ngawt lah chu tlawm ah ka la ve tho bawk si, "Rinpuia chu ni ve lo mahila min kawm in min be ve duh tho ang em?" Kan ti ringawt chu a hriatthiam loh hmel kher mai, "Eng nge a awmzia? Tu Rinpuia maw?" a rawn ti a.

"Aw Mawitei call la duh lo tu kha mawle"

"Eng tin nge Rinpuia .." a ngawi deuh hmak a, "nangmah hi i ni maw ka lo call sual na kha" a ti a, mak a tih hmel khawp mai, kei chuan ka lu ka lo bu ve deuh nghut a, a ngawi vung vung a "aaaa ka awih lo e, mahse kan inbiak dan i hre bawk sia, a van mak ve le, awihawm loh zawk e" ti pah chuan a nui a.

Kei in ka tum ka lo hlawhtling ve leh chiah bawk a, tukin lam a ka chet thing na lutuk atang thil dang hmang in a rilru ka la peng thei a, a ruk tak chuan ka hlim hle mai a, chutia kan in sawi tak ah chuan a ni pawh chu a tawng duh ve sawt ta hle a, rin ai tak chuan kan in kawm thei ta fu a, Remruati rawn lut pawh chuan mak a rawn ti hle a.

"Kha nangni pahnih chu in va in kawm theih hmel ang reng ve a, rawn thut ve pawh a nuam dawn lo a ka tibuai mai mai ang che u a" a rawn ti fiam nghal bawrh bawrh a, Remruati hi chu a thawveng in a ri deuh phawr phawr tih loh ah hi chuan a fel a fiamthu a duh bawk a, a bul a awm te hi a hahdam thlak fu zel reng ani.

Phone call sual vel atang a kan inhriat dan vel te chu Mami chuan a hrilh a, ani pawh chuan mak a ti ve hle a, thil ho tak tak sawi chuan chhun chu ka thleng thuai a, thingpui in zawh chuan tlai lam inkhelh vel chhuanlam chuan haw ka tum ta a, zan lam a leng leh tur a kan in tih zawh hnu chuan ka haw phei san ta a.

ANGEL

            HLUTNA

Rei lo te ah Gabriel chu a rawn thleng phei leh vat a, "I la hman na nge a? Ka hmanhmawh tawh asin, kal vat angai a" a rawn ti leh ta bawrh bawrh a, ka insiam min nghah pah chuan ka nu bul ah dawt lo sawi zuap zuap pah chuan a lo tawng tui leh hle tawh a, ka hman meuh chuan thian dang te pawh an lo awm leh thup tawh a, thianho zing a nghah ngai ber kha ka ni ve hrim hrim a, an hrethiam tlang viau thin tho.

Kan chhuah na tur lam pan chuan kan in zui chhuak leh dal dal a, an zu lak na tur lam kan pan nghal a, kal kawng ah te chuan kan ri thla deuh mawp mawp hlawm a, khawlai te chu kan pa te ta ni awm fahran hian han zah leh hlauh em em pawh nei lem chuang lo chuan kan ri lung lung hlawm a, Rawlthar rual awm ho tih tak ah midang pawh hian eng ah teh vak min ngai lo a ni chek ang chu min en liam ve mai mai zel reng thin bawk ani.

Bja chu ding deuh chat a, a hmasa ber a kal a ni bawk a, min lo ti ding ve thuai hlawm bawk a, hmuh thiang loh hmu ang mai chuan hma lam a a thil hmuh chu a thlir vung vung ringawt a, "Eng nge ni a?" ti a kan zawh lah chuan "in hriat ve angai lo, kan kal thei"  ati a, a kal leh nghal nul nul ringawt a, "a hmelchhiat thlak mange aw" ti chung a Davida zui ve nghal thuai chu nuih deuh vur vur pah chuan midang pawh chuan kan zui ve nghal a.

An thil lak tur te an lak zawh chuan nidang a kan tih dan ngai te bawk in School tlang lam chu kan pan leh nghal thuai a, a awm na hi a fal deuh bawk a ka thiante tan chuan hmun duhthusam hi ani ringawt mai a.

Kan thleng chho a rei pawh thu lo chuan an thli a, an in leh deuh nghal mial mial mai, kei chu an sir ah chuan ka lo thu ngawi ve reng bawk a, an in hma hi chuan fiamthu hian "i in ve tawh ang chu" an han ti thin tak na a, an in meuh hi chuan ti ve chhin tur pawh hian min sawm ngai lem lo a, hetiang lam hi chu in Hmangaihna te induhsakna te lan tir na tur dik tak ani lem lo tih an hre bawk aniang chu, fiamthu a in ve kan dil chhin pawh hian "I in ngai lo ta sa sa in lo law law rawh" an ti thin reng ani.

An tha tan tawh viau ani ngei ang, an ti ti pawh an tui tawh hlawm hle a, "In hnem vak suh u, tlai lam ah in chhungte'n an hau che u ang a, chaw pawh ei puar mang hlei lo in in rawn chhuak leh ringawt ang e" ka tih chu hria ang pawn an lang lem lo.

An sir a ngawi reng a ka lo thut ve reng lai chuan message ka dawng a, "Vawiin khan ka lo call sual a, ka lo hau ve vak ringawt che a, ka tihpalh lutuk aw" tih zawng hi ani a, ka nui deuh suk a, "A ho lutuk, keima thiam loh zawk a nih kha a tir ah khan ka lo in sawi nghal mai lo a" ti chuan ka reply ve vat a.

Mahse message dang reng ka dawng tawh lo, eng vang nge ka hre lo, mi rawn reply leh ka beisei ve leh ringawt reng reng ni, sawi tur ang kan sawi zo tawh a, in hmelhriat leh in thian tha kan ni lem lo a, mahse a message dawn leh chu ka in beisei tlat a, min reply hun nghak in ka phone chu ka lo hum nghet ve em em ringawt mai ani.

Ka thiante lah chu an bengchheng leh tan viau tawh a, an thusawi te chu an sir ah ka lo khik pui ve leh suk suk thin a, "thukru ru, thukru ru hmanhmawh ve ula" ti pah a BJa'n zu um leh no vel a dah fel vel mawp mawp chu midang chuan tih ngaihna hre lo zet hian kan lo en deuh ha a.

A hnu lawk ah chuan hmeichhe 4 hi kan awm na bul ah chuan an rawn chhuak phei a, BJa chuan an ni ho chu hmu in a lo thukru hi a lo ni a, Gabriel chuan ei loh hmel deuh hian a lo en a, mipa in la pa ve tawk tak kan ni hlawm a, nidang ah chuan min hmu pawh awm se kan hriat ngai loh an nih chuan kan thukru ngai lem lo, hriat loh a kar a hmeichhia leh nghal an hmel en in kan rualpui vel tih hriat ngawih ngawih an ni a, an ni vang mai mai a chutiang a BJa awm chu Gabriel chuan a ti vak lo tih chu a hriat theih a.

"Junior nang ni thianho bawk ani maw! In thawm a ring ka ti reng a" a rawn tih chuan ka va en phei a, Remruati te lek an lo ni, "van ho mai mai e aw, mi pangai tur ah kan ngai ve che u a" Gabriela'n a rawn tih chuan "mi pangai kan ni lo ami? Nang lah hi a" lungawi vak lo tih hriat tak hian Remruati chuan a lo chhang ve leh nghal vat a.

"Taka Junior in chungchang vel kha ka lo hria a, a zia lo hle mai" Remruati chuan a rawn ti a, "a ho emai a, chutiang an sawi an sawi ngai lo, a hrim hrim in tun ang tlai ah he lai ah te eng nge in rawn tih a?" nui deuh suk pah chuan ka lo ti a.

"Hei mami hi school kal tur in kan bul ah a rawn awm dawn a, school leh kan veng vel kan rawn fan kual pui vel thuak thuak anih hi, in zahawm thep thup emai kan chhuk san mai ang che u" nui vur vur pah chuan a ti a, an kal leh ta nghal mai a.

"Kha tiang Remruat thawvengi te vang mai mai khan maw i lo thuhruk a?rawn phawrh leh vat mai teh" Gabriel chuan BJa rum deuh a melh pah chuan a han ti a, "aw kha mami a sawi kha, kan lak dawn a kan kal lam a ka din chat na chhan kha nia, chuan amah kha ka hmu tel ve leh bawk sia, ka hre ngai bawk si lo a, ka zah ve alawm" ti deuh nuap nuap pah chuan a phawrh ve leh mai bawk a.

"A bialnu nei ber hi  i lerh ber a, a buaithlak deuh hret chu ani" David chuan a lo ti ve thuai bawk a,"A chhiat loh em kha mawle" BJa chuan rang fahran hian a lo chhang ve nghal a.

"Kha tiang ang hmel te chu duh ila lehkhazir pawh kan ngai tawh nang le" Gabriela'n a lo ti chu, "i rui tawh a, kha i meng leh hlei thei tawh lo a, i hmu chiang ve lo anih kha" BJa'n a tih leh chuan kan nui deuh huk a, a tu nge rui ber pawh hriat theih loh chuan an inhnial buai leh nak nak hlawm a, a chang leh an nui leh deuh huk thin, a tlai ve tawh bawk a zan lam a in hmu leh tur chuan kan in thlah fel ta hlawm a.

Thla eng em em te leh a chhehvel a arsi de sep sep te chuan an eng hliah tu tur chhum awm lo chu lawm ni awm fahran hian zan dang ai mah hian an eng zawk in an mawi zawk amaw tih mai tur chuan an awm a, ka room tukverh atang chuan hla ngaithla pah hian ka thlir reng a, "Jen hian a hmu ve ang em le? Mawi ti in a lung an ti leng ve tho ang em le? Nge ni a ngui tak in hun a hmang zawk ang aw" tih te chu ka ngaihtuah a.

Thawm a rawn ri leh ta bawrh bawrh a, hrilh hranpa ngai lo chuan ka thiante ho an ni tih ka hre thei mai, room lam ah an rawn lut tlang leh nghal mai a, an tih dan ngai te in biak pawh mi rawn be lem lo chuan an phone an rawn khawih leh ta neuh neuh hlawm mai, mahse an biak leh an hnem kher hi ka ngai lo a, ka kiang ah an awm ve tih ka hriat ringawt pawh hian ka hahdam a, ka hlim thin ani, an ni ho hi ka tan chuan an hlu a, ka hlutna mi hriat chhuah tir thin tu te pawh an ni tho hi an ni.

"In a awm reng lo hian leng chhuak ve thin ta che u, in la tlangval ve tawh si, nula rim na chang hre bawk si lo, nge rim tur in hmu zo ve lo zawk?" Ka thawmhnaw rawn dah pah chuan ka u Seni chuan a rawn ti bawrh bawrh a, mahse a thusawi ngaihthlak chu sawi loh a rawn lut tih pawh hre lo ni awm fahran hian an phone khawih chu an lo khawih san vel mai mai a, a ni pawh a chhuak ve leh nghal mai bawk a.

"Hei vawiin mi kha a number ka nei tawh ania" BJa'n a rawn tih chuan, kan lo nuih ringawt, he pa tak hi chu aw a duh na lam ah hi chuan a che chak thin mang e, "ngaihzawng chu neih mai mai tur, hmangaih tih vel te hi neih an ngai kher lo, duh leh a hming hian han hrilh ve mai mai ila a tawk, tun ang lai ah chuan Hmeichhia hi rin tak tak tawh loh tur" tih thupui a nei tu kha ani miau a, a hmuh hnuhnun a piang hi hmeltha a ti amaw tih mai tur lah hian a ngaihzawng hnuhnung hnung hi a sawi chhelo em em zel ringawt mai bawk a.

Zan dar 9 vel ani a, ka chhungte chu an reh thiap tawh , Gabriel chuan vawiin lam a an in bang kha a lo keng hi ani a, dim deuh tak mai in sitting room lam a ka chhungte ho an awm leh awm loh va en pah chuan ka room kawngkhar chu a rawn kalh sawk sawk a, "hei he tah tih in tum ami a?" ka lo ti ve thuai bawk a.

"Nih mai loh in khaw nge ni chuang ang,i chhungte pawh an mu vek tawh tho alawm"

"Va buaithlak thin e aw, ti vat vat ru, zan dang ah chuan tih awih loh, min ringhlel ve palh ang e" 

"Tak tak ah ti hrih lo mai ang u, haw kawng ah tuikhur bul ah khan duh leh kan ti mai dawn nia"

"Ti mai mai teh u, zawng chhang lo ula ani mai" ka tih pawh chuan an ti duh ta tlat lo a, ka in ve ngai lem loh avang hian in chhung a tih pawh hi ka rem ti lem lo a, an ni pawh chuan chu chu hrethiam in an ti luih ngam ta bik lo a, chhungkua ah leh thianho ah pawh hian in zah der na leh in hriatthiam tawn na a awm hi chuan thil hi a awlsam sawt thin reng ani.

Rei vak lo ah chuan an ni pawh chu an haw zui ve leh mai bawk a, mahni in ka khum ah ka tal ka tal leh tawh a, thla eng chuan ka khum chu a rawn chhun che che a, van lam ka en a "khi khi ka arsi ani a, hmun hla deuh ah pawh awm mahla arsi khi i lo thir ang a, tichuan min hmu thei mai dawn ani" ti a Jen min hrilh chu ka hrechhuak a, arsi chu ka thlir ta reng ringawt a.

Jen nen thlir dun thei ila chuan a nuam zual tur hi ani a, chung thla leh arsi eng mawi tak te chuan an mawina phen a khawhar na bak chu ka tan chuan neih an nei ve bawk si lo, Arsi chu thlir in ka tan hlu viau mahse, ani in min thlir ve loh a, a tan hlutna ka neih ve chuan si loh chuan natna mai ani bawk si.

ANGEL

              TUARNA

Hun a kal ve zel a, rei vak lo ah exam pawh chu kan zo ve mai a, Jen chhungte leh ka chhungte, midang dang pawh chuan Jen rai thu chu an hre ta deuh vek a, mahse an rin ang in keimah ka ni lo a, a fa pai na pa chu Rinmawia a ni tih an hriat chuan mak an ti hlawm hle a.

Ni e, a bialpa an hriat thin kha chu keimah ka ni a, mahse a fa pai na pa ka ni lo kha chu hriatthiam a har dawn bawk em ani, pawn lam ah ka theih ang tawp in ka tuarna chu ka thup luih ve tang tang a, mahse ka thupna a nasat pauh leh ka chhungril in a tuar chu a na zual zawk mai si a, ka thiante chuan an thiam ang tawk tawk in min hnem ve reng a, mahse a tuar tu leh a lo tuar tawh an nih loh a vang chuan min hnem thiam lem lo khawp mai, mahse tiang hun ah hian thian tha leh hmangaihtu kan lo nei hi chu an hlu tak zet ani.

An tih dan ngai te bawk in ka thiante chu am rawn ri lut leh nghal bawrh bawrh a, ka room lam ah kan awm ho leh thap tawh a, Gabriel chuan Jen te an inneih dawn loh thu leh an rem loh thu vel a sawi mawlh mawlh lai chuan ka lawm nge ka na zawk pawh ka hrethiam lo, "Eng nge a awmzia tu zawk nge rem lo a?" Ka lo ti nghal thuai a, "Chutiang engmah thu chiang kan hre bik lo" a tih leh tak si ah chuan ka sawi chhunzawm duh ta bik lo a, an ni pawh chuan sawi chhunzawm chi ah an ngai lo nge ni , an phone khawih in in be lem lo chuan an ngawi leh ta hlawm thap a.

Amah ka hmangaih em vang a, a fa pai lai ti tla a, kan nun dan pangai a nung leh mai tur a ka tih ni a a thinrim zia leh hetiang mi ka nih loh thu te a sawi lai te chu ka ngaihtuah let a, mahse tunah an innei dawn lo a, a fa chu amah in a enkawl ang a, Nula hmeltha leh fel ti a mi in an sawi tur kha "Sawn a pai a" ti a mi in an sawi tur te ka ngaihtuah chuan ka khawngaih in ka thin a rim hle a.

Gabriel bawk chuan "Eng nge i lo ngaihtuah leh tak a?" a rawn tih chuan ka harh zawk a.

"Jen mawle an innei leh dawn si lo a, ka khawngaih ru riau a" 

"A ho emai ngaihtuah duh suh, tunah chuan a inchhir ve tawh khawp ang, saw tiang saw chu ngaihtuah pawh ngaihtuah zui chi an ni tawh lo" a ti a, ka lo nui deuh sak ringawt a, Ni e ka thiante hian min ngaihtuah a, ka Hmangaih zia leh ka duh zia an hria a, a tan awm in a bul ah ka lo awm leh mai ang a, chu tih hun ah chuan midang sawi duh dan tur an hre lawk a, chuvang chuan ka bul ah hian Jen pawh hi an sawi chhe nasa thin khawp mai, mahse ka lo nui luih pui ve mai mai thin a, dik tak chuan a ruk tak in ka lo tuarpui em em thin zawk ani.

Kei chuan Jen hi ka ngaisang ru riau zawk a, ti tla tur a ka hrilh pawh khan a duh lo a, a vanduaina chu nat pui viau mahila hriatthiam na thuk tak nen a chanchin hi ka ngaihtuah hram hram thin, tunlai thalai tam tak fa loh vang a sawi chhiat hlawh ve lo te , an pum chhung ami ngei tih tlak duhna rilru pu te ai chuan hetiang zawng zawng tuar a huam hi kei chuan ka ngaisang zawk ani.

Ka thiante pawh chu an haw ta hlawm a, ka khum a mu pah chuan ka phone chu ka tuai let ka tuai let ta ringawt a, Jen chungchang mi in an hriat darh hnu khan pawn ka chhuak tam lo a, social media lam pawh ka khawih tha peih ta meuh lo kha ania, a ruk in mahni chuan ka tuar ve tlawk tlawk mai ani.

Fb lam a kan thianho chat group te chu ka en kual vel mai mai a, an lo in fiam leh bawrh bawrh tawh hlawm a, an tih dan ngai te in thianho zing a fiam rawn hlawh ber BJa leh a bialnu chungchang vel te chu an lo sawi a.

Ka phone chu a rawn ri a, rin loh leh beisei loh ber mai Jen a lo ni reng a, ka lo pickup ve thuai bawk a.

"Aw Hello..."

"I lo la meng maw?, Fb lam ah ka hmu thut che a, ka lo call tawp anih hi"

"Imm meng e, a pawi chuang hleinem, i va muhil har reng reng ve a"

"Nia tunlai chu ka muhil har thei lutuk, nang pawh i va meng rei ve a"

"Nia hei mut ka lo tum chiah a"

"Aw ni maw, i mut tum lai tak in ka lo call che ani maw, nih chuan ka dah mai ania, Muttui aw"

"Dah kher ngai chuang hleinem, ka la muhil dawn chuang hleinem" 

"Aaaa muhil rawh, a tlai tawh lawm, muttui le" tih leh off chu a rual ta mai a, dik tak chuan ngai in be chak thin viau mahila amah ka hmuh leh ka biak hi chuan tha tak ang a lang si in hreawm tih ruk na hi ka nei tlat thin a, a off pawh chu ka pawi ti em em hran chuang lo.

Thil ngaihtuah neuh neuh chung chuan ka lo muhil ve leh mai a, Zing ka harh chuan dar 9 a lo pel tan der tawh mai, ka chhungte pawh chu tumah awm an lo awm lo a, Result nghak mek kan ni bawk nen tunlai a ka chanchin vel ka chhungte hian an hriat ve tho vang hian a ni chek ang chu tum dang ah te chuan thawh ka hai ve pawn zing dar 7 ah hi chuan min kai tho ngei ngei zel kha ani si a, mahse tunlai chu ka duhdan hian min nun tir a ni deuh ber mai.

Rei vak lo ah chuan ka thiante an lo lang phei leh thuai hlawm bawk a, an tih thin dan ngai te bawk in an bengchheng leh ta nuai nuai hlawm hle mai, mahse an ni lo awm hi chu a van tha tak e aw, khawhar leh in ngaihtuah ngui na hun pawh hi ka nei hman meuh lo ani.

"Lo bengchheng lo lawk teh u, hei zu tlawm deuh a lak na tur a awm anih hi in duh hlawm em" Gabriel chuan a rawn ti chhuak deuh thut a, ngawi deuh thap hian thil pawimawh deuh sawi tur a an em vang chuan kan lo ngaithla deuh hlawm thap a, mahse a sawi zo chu kan nui deuh thu hlawm mai.

"Duh e, tih loh na a rei tawh alawm, hei tunlai chu mamawh fal deuh te pawh a awm a, ti ngai lo mahse tun tum chu a ti ve duh tawh lutuk ang chu" mi rawn en deuh zuk zuk pah chuan BJa chuan a lo ti ve thuai a.

"Khai tiang hun lai tak hi lawm in sum hun chu, Tirhkoh Paula pawn 'ka chak loh apiangin ani ka chak thin ni' a tih kha" ti chuan in la Puitling deuh tak chuan fiamthu deuh chuan ka lo chhang ve leh vat bawk a.

An nui deuh thu hlawm a, mahse zu pawh chu  lak tur chuan an be zui ta tho a, dik tak chuan tun din hmun ah hi chuan ka in chak ve khawp mai.

"Zu hi mi ang lo a min siam tu ani a, kan nih tur kan nih phak loh na chhan te , pian sual na lang chhuak si lo a, piangsual a min siam tu chu zu hi ani, chuvang chuan nang chuan tem pawh tem chhin ve reng reng suh ang che" ti a ka nu min fuih thin na kha lo theihnghilh in lo ngai pawimawh lo chu ni ila tun hun ah hi chuan ka in ve ngei ang a, mahse rei vak lo ah a bawih ah pawh ka tang chhunzawm ve leh ngei awm si a.

Ka phone chu a rawn ri a, number lawng hi a lo ni a, in chhung lam a an bengchhen deuh avang chuan pawn lam ah ka chhuak a, ka pickup ta nghal a.

"Aw Hello"

"Lalrinpui phone hi la ve vat zel teh, nga ti nge Mawitei call i lak duh loh a?"

"Lak kher a ngai ami?" ka lo ti sam et a, a chang hi chuan ka chimawm in ka ngeiawm thiam ve fu thin a, a biak tum ka ni lo tih chu ka hrechiang a mahse ka lo chhaih kual hmasa vel phawt a, a tawp ah chuan thinrim deuh tak in phone chu a dah deuh hmak a.

Tu nge anih hre lo mahila min ti hlim fu mai, mahse ka in sawifiah hma in a off ta daih si a, nuam lo tih ruk na riau chu ka nei a, in a ka lut chu ka lo nui lut deuh nge ni, ka thiante chuan "Lawm loh a nui chu mi mawl" tih leh min chhaih zui chu an rual leh ta nghal a.

"Nang hi kan hriat loh in ngaihzawng  i nei em ni? I va be rei ve" David chuan a lo ti thuai a, ka nui deuh thu a "Ngaihzawng a, a hriat pawh ka hre ngai lo, ka chhaih mai mai anih kha" ka tih chuan an awih hmel viau hlawm loh hle mai, mahse min zawt zui an awm tawh chuang lem lo a.

Tlai lam deuh ah chuan an zu lak tur vel ngaihven hma a ngaih vang chuan an haw darh ta hlawm a, an haw chu a reh phah hawk mai, mahse rei vak lo ah ka nu pawh chu a lo thleng ve leh vat a, a kal na te ka zawh hnu chuan ka room lam ah ka luh san leh ta daih a, Ka phone chu a rawn ri a, Gabriel a lo ni reng a.

"Aw Hello"

"Tlai ah khan len chhuah pah a lak kan tum a, lo kal ve rawh aw, i chhuak vak khat lutuk a, a tha lo , ka rawn sawm ang che" tih leh phone off chu a rual ta nghal mai a, he mi te ho tak hi chu ka thiante an ni lo ang tih hi ka van hlau thin tak em....